Къырал чекден ётген кезиуде даулашла чыкъмаз ючюн

Акъылбалыкъ болмагъанла тыш къыралгъа чыкъгъан кезиуде къаллай жорукъла бардыла? Соруугъа жууапны РФ-ни ФСБ-сыны Чекчи службасыны КъМР- де Управлениясыны пресс-службасындан бередиле:

- Россейде эпидемиология болум бла байламлы инсанлагьа тыш къыраллагъа чыгъаргъа чекле салыннган эдиле. Ол санда автомобиль эм темир жоллада, черекледе, тенгизледе пунктла ишлемегендиле. Бир-бир къыралла бла келишимлеге кёре, авиабайламлыкъла сакъланнгандыла.

Къырал чекден самолётда ётген кезиуде жорукъла тюрленмегендиле. Инсанны биргесине тийишли документлери болургъа керекдиле. Аны бла бирге тыш къыраллада болгъан излемлени да толтурургъа борчлудула адамла. Сёзге, коронавирус бла аурмагьанына шагъатлыкъ этген справканы неда башха документлени да хазырларгъа тийишлиди.

Акъылбалыкъ болмагьанланы юслеринден айтханда, «РФ-ден тышына баргъанда неда РФ-ге келгенде низамны юсюнден» федерал законнга кёре, сабийни биргесине атасы неда анасы, осуйлукъ этген адамы болургъа керекдиле. Аладан бири да бармай эселе, сабийни паспорту бла бирге ата-анасы ол тыш къыралгъа баргъанына ыразы болгъаныны юсюнден документа да болургъа тийишлиди. Аны нотариус къабыл кёреди. Анда сабий къайсы къыралгъа баргъаны, анда не замандан не заманнга дери турлугъу да жазылады.

Эсигизге салайыкъ, сабийни законлу келечисинден бири (атасы, анасы, осуйлукъ этген адам) ол тыш къыралгъа баргъанына ыразы болмаса, сорууну сюд органла тинтип, тийишли оноу чыгъарадыла.

Къырал чекден ётген кезиуде ангылашынмаулукъла, даулашла чыкъмаз ючюн битеу документлени алгъадан да хазырларгъа, сабийни тыш къыралгъа барыргъа чырмаула болгъанларын бла къалгъанларын сураргъа керекди. Бу шартланы уа РФ-ни МВД-сыны Миграцияны соруулары жаны бла бёлюмлеринде билирге онг барды.