Энергокюч бёлюмню айнытыугъа алланып

  Кёп болмай Элбрус муниципал районну электросетьлерин  беш жылгъа ортакъгъа «Россети Северный Кавказ» компаниягъа берирча   келишим этилгенди,  деп билдириледи жер-жерли администрацияны  пресс-службасындан.

Районда энергокюч  мюлкге тийишлисича  эс бурулгъаны не заманда да бирси муниципалитетлеге  юлгю болгъанлай турады. Ол себепден мында бир тюрлю заран салырча неда  къоранчла келтирирча  иесиз объектле жокъдула. Болсада   «Каббалкэнерго» биригиуню  специалистлери эсепге  алыннган  энергосетьлеге инвентаризация бардыргъандыла.   

 - Юйле, организацияла, предприятияла, коммунал мюлкле, аграр сектор эм транспорт бёлюм ток бла тынгылы жалчытылынырча энергетиклени  уллу  къыйынлары барды. Бусагъатда  ансыз жашау этерге онг жокъду деп таукел айтырчады.  Ол себепден  арада этилген келишим тамблагъы кюнюбюзге  базынырча этеди, -деп билдиргенди Элбрус районну администрациясыны башчысы Залийханланы Къаншаубий.

Белгилисича,  жууукъ заманда  Элбрусда  турист-рекреация зонаны   айнытыу республиканы  экономикасыны къыйматлы  проектлеринден бирине саналгъанды.  Анга кёре, мында электросетьле да игилендирилликдиле.     Аны чеклеринде жууукъ заманда жангы  тау - лыжа трассала, инженер,  транспорт эм башха инфраструктура да  жангыртыллыкъдыла. 

 - Биз туркомплексни саулай  объектлерин  ток бла толусунлай жалчытыргъа хазырбыз. Ол а  аланы ишлерин чырмаусуз бардырыргъа эм арт заманда аслам келген туристлени ыразы этерге да болушурукъду, -деп къошханды  «Россети Северный Кавказ»   компанияны бёлюмюню «Каббалкэнерго» биригиуню таматасы  Муртаз Каров.

Бюгюнлюкде Къабарты-Малкъар энергокюч объектлени бирикдириу планны толтуруу бла  Шимал - Кавказ федерал округда алчы жерни алады. Андан сора да, 2018 жылда  «Энергоньюс Медиа» агентство бардыргъан рейтингге кёре, республика 70 регионну арасында юч биринчи тизмеге киргенлени санына   тюшгенди. Тинтиулени кезиуюнде  аварияла, ремонт-профилактика ишле  эм башха тюрлю-тюрлю жумушла да къалай бардырылгъанларына эс бурулгъанды.