Кемчиликлени кетериуню излегендиле

Битеуроссей халкъ фронтну Къабарты-Малкъарда бёлюмюню келечилери жамауат тийрелени тапландырыу жаны бла программа быйыл Май шахарда къалай толтурулгъанын къайтарып жангыдан тинтгендиле. Жерине барып къарагъанларында,  алгъын ачыкъланнган кемчиликле кетерилмей  тургъанларын кёргендиле. Къалай болсада, шахарны мэриясына энтта да бир кере эсгертиу жиберирге тюшгенди, деп билдиргендиле ОНФ-ден.

Юч ай алгъа не тюрлю кемчиликле  бар эселе да,  бары да жериндедиле: канализация ызлада талай къуюланы башлары жабылмай, жол жанларында орнатылгъан чыракъла жанмай… Жарты-къурту этилген ишлени хатасындан адам ачыргъа боллугъуну сагъышы этилмейди. «Хар зат тапды деп белгиленнген  тийишли актлагъа октябрьде окъуна къол салыннганды. Алай, биз кёргенибизча, кёп жерледе иш ахырына дери этилмей къалгъанды. Бегирекда башлары ачылып къалгъан къуюла сагъайтадыла. Чыракълада бирлери жанмай, бирлери уа ток ызлагъа окъуна къошулмай турадыла», - дегенди ОНФ-ни регионда штабыны башчыларындан бири Андрей Попета.

Кемчиликлени санына жамауатны келечилери талай жерде бордюрла болмагъанын, къурулуш ишледен сора къалгъан-къулгъанла тёгюлюп тургъанын, кир-кипчикни ташыр жерле къуралмагъанын белгилегендиле.

Федерал проект къалай бардырылгъанына организацияны келечилери мындан ары да эс буруп  турлукъдула.