Къыш сууукълада къоранчланы азайтырча

Кёп болмай «Россети Северный Кавказ» компанияны  бёлюмю  «Каббалкэнерго» биригиуню  таматасы  Муртаз Каров,   районлада электрокюч сетьлени баш инженерлери  да къатышып,  оператив  штабны кенгешин бардыргъанды. Ол   къыш сууукълада къоранчланы азайтырча мадар этерге кереклисине жораланнганды, деп билдиригендиле  компанияны пресс-службасындан.   

Тюбешиуде аслам эс бу жаны бла эм жарсыулу  Зольск  бла Бахсан районлагъа бурулгъанды. Аны бла бирге къыйын  табийгъат болумланы  кезиуюнде  аварияла болмазча профилактика  ётдюрюрге эм аланы къысха заманда кетерирча бар кючню салыргъа тийишлиси  айтылгъанды.  

Быйыл декабрьни биринчи  кюнлеринден окъуна сууукъла    ток баргъан ызланы бузлатхандыла.  Ол а хауа терк-терк тюрлене тургъаныны хатасынданды.   Аллай кезиуледе уа  бютюнда   тау жерледе орналгъан электрокюч объектле  бузулургъа ёчдюле.  Аны ючюн специалистле    дайым кёз-къулакъ болгъанлай   турадыла.   

Муртаз Каров  абонентлени жарсыуларына диспетчер  службалада да  энчи   эс бурурупча тийишлисин  чертгенди.   Андан сора да,   районлада электрокюч бла толу жалчытырча планланы хазыр этерге эмда   кадрланы саулукъларына заран жетмезча сакълыкъны  унутмазгъа   эсгертгенди.  

Бусагъатда Элбрус тау - лыжа курортха  да   аслам турист келип башлагъанды. Ол себепден районда  РЭС-ны келечилерине аланы ток бла сылтаусуз этерге  эм энергообъектлени болумларына дайым контроль бардырыргъа буюрулгъанды.  Анга кёре бюгюнлюкде мында  администраторлукъ  эм ремонт этген къауум да суткала бла   дежурство бардырадыла.