Жамауатны келечилери актёрлагъа билеклик этгендиле

Битеуроссей Халкъ фронтну Къабарты-Малкъарда бёлюмюню келечилери, бир бирге билеклик этиу жаны бла #БизБиргебиз деген битеуроссей акцияны чеклеринде «Понаехавшие» деген атлы театрны актёрларына болушхандыла. ОНФ-де айтханларыча, бу театрны труппасы репетицияларын бардыргъан мекямгъа быйыл октябрьде от тюшген эди. Аны бла аланы реквизитлерини асламысы да кюйгенди анда. Активистле ахча жыйып, актёрлагъа эмда режиссёр Татьяна Панкратовагъа къолдан келгенича болушлукъ этгендиле. Ала бояула, картон, къагъыт, жангы кийимле тигерча къумачла, башха затла да сатып алгъандыла алагъа.

-Бек керекли затла берилгендиле бизге. Этилген ишни хайыры бла эски декорацияланы бир кесегин жангыртыргъа боллукъду энди. Аласыз а репетиция бардырыргъа, не спектакль салыргъа чыртда амал жокъду. Къараучуланы кёллерин алыу, постановкада нени кёргюзтюрге сюйгенибизни ангылатыу дегенни уа унут да къой, - деп белгилегенди театрны режиссёру Татьяна Панкратова.

Жамауатны келечилери, декорацияланы жангырыуну къайгъысын этгенден сора да, «Биз биргебиз» деген клубну келечилери бла бирге актёрлагъа репетицияла бардырырча жангы мекям излегендиле. «Нальчикни Маданият дворецинде алагъа отоу табылгъанды. Актёрла узакъгъа да соза турмай ары кёчерикдиле. Алай репетицияларын а шёндюден окъуна бардырып башлагъандыла», - дегенди ОНФ-ни келечиси Ислам Макоев.