Хар аш да адамгъа бирча келишмейди

Бизни къайсыбыз да ашны жаланда бир тюрлюсюн хайырланып турмагъаныбыз баямды. Аны башха-башха этерге кюрешебиз, аны юсюне татлы суула, кофе неда чай да къошабыз. Алай ала бир бирлерине келише болурламы? Аны юсюнден билгенибиз а хазна жокъду. Алайды да, бу соруугъа Россельхознадзорну КъМР-де Референт арасыны специалистлери жууап бередиле.

Алайды да, сёз ючюн, какаогъа сютню къошханлыкъгъа, ол адамгъа хайыр келтирлик тюйюлдю. Нек дегенде биринчисинде щавелевая кислота барды, ол а сютде кальцийни татыргъа къоймайды. Бюйреклери ауругъанлагъа уа бу экисин бирге хайырланыуну арталлыда къояргъа керекди. Какаода болгъан оксалатланы сют жау аслам халда татымагъа къояды, ол а саусузну халин осалыракъ этерикди.

Акъ ундан бишген ётмекге джем жагъып да азыракъ ашаргъа керекди. Быланы экисинде углеводлары кёп болгъаны ючюн къанда бал тузну ёлчеми кёбейеди. Бу затланы терк-терк ашап туруу артда диабетге, семизликге, аш орунда эм чегиледе ауруулагъа келтирирге боллукъду.

Къышхырны бла сютню да бирге къошаргъа керекмейди. Биринчисинде фитиновая кислота барды, ол сютде кальцийге къошулуп, эримеген затлагъа тюрленеди. Аны ючюн саулукъгъа хайырлы минералла татымай, аш да иги жарашмай къаладыла. Тауукъ этде болгъан цинк а бауурда В9 витамин бла бир бирлерин тыядыла.

Газы болгъан татлы сууланы бла пиццаны бирге хайырланыуну специалистле бютюн бек жаратмайдыла. Экисинде да къадар углеводла, белокла, трансжирле болгъанлары ючюн. Аланы барын да жарашдырырча кёп къарыу керекди. Татлы сууда бал туз аш орунну тап ишлерге къоймады. Быланы экисин да бирге хайырланыу адамны къолун-санын тюшюреди, къанында бал тузну мардасын кёбейтеди.

Ашладан сора дарманла неге келишмегенлерине да эс бурургъа тийишлиди. Сёз ючюн, аспирин неда ибупрофен ичген кезиуде наныкъны ашаргъа керекмейди. Нек дегенде ол кеси да салициловая кислотадан байды. Къанда холестеринни мардасын азайтхан дарманлагъа уа грейпфрутну сууу чыртда келишмейди.

Къанны жукъартхан препаратла (варфарин) бла шпинатны, брокколини, салатны къатышдырыргъа жарамайды. Муркку, тукъузгю, чюгюндюр, мароко уа къанны басымын тюшюрген дарманланы бютюн кючлю этедиле. Психотроп препаратлагъа бишлакъ къошулса, ол къалтырауукъгъа неда гипертонический кризисге келтирирге боллукъду.