Кечеледен биринде къыйын ауруула тюшюрюледиле

Сабийлигибизде  аммаларыбыз  сауутланы башларын таза быстыр бла жапханы, бизден да аны излегени кёплени эсинде болур.  «Мамырлыкъ» жандауурлукъ фондну башчысы Ахматланы Назир хажини ангылатханына кёре, ол  унутулгъан сюннетди.

Джабир бин Абдиллях былай айтханды: «Мен Мухаммат файгъамбар, Аллахны саламы анга болсун, былай айтханын эшитгенме: «Аш эм суу жюрютюлген сауутланы башларын жабыгъыз. Кертиди, жылда кечеледен биринде  жукъгъан ауруула (вирус) тюшедиле. Аллай кечеде аш-сууда хайырланылгъан сауутланы башлары жабылмай къалсала, ауруу аланы юсюнде къаллыкъды». (Муслим).

Алимлени асламы Мухаммат (АСБ) бу хадисде адамны ёлюмге жетдирген   белгисиз къыйын аурууну юсюнден билдиргенин айтадыла.  Анда  «аль-уабаа» деген сёз тюбейди. Ол а эм къыйын, къоркъуулу затны ангылатады. Медицина терминле бла айтханда, сёз вирусну, эпидемияны, пандемияны юсюнден барады.

Хадисде ауруу тюшюрюллюк кечени Аллахутала жангыз кеси билгени да чертиледи, дейдиле алимле. Дагъыда анда къуру кече сагъынылгъанлыкъгъа, сёз сау кюнню юсюнден барады. Аны себепли аш-суу хазырлагъанда, ауузланнганда  жюрютюлген сауутланы башларын жабаргъа керекди.

Бу кезиуде уа Аллахуталаны атын сагъыныргъа, «Бисмилляхи» дерге тийишлиди. Табакъны, кружканы жабарча зат жокъ эсе биргегизге, таякъчыкъ, чапыракъ, къысха айтханда, къолугъузда  болгъан затны хайырланыргъа да жарайды.

Ауузланнгандан сора сауутла жууулмай къалгъан эселе, аланы да   жабаргъа тийишлиди. Алай игиси – аланы тазалап, алай этергеди. Аны энтта башха магъанасы барды - алай бла табакъны тюбюнде къалгъан ашыгъыз шайтаннга жетерик тюйюлдю. 

Ичинде жукъ да болмагъан сауутланы баш тёбен айландырыргъа тийишлиди. Былайда  сауутла асыралгъан шкафха жыйып къойгъан тамамлыкъ этерикмиди  деп сорлукъла да болурла. Аланы да жерлерине Бисмилляхи деп салыргъа керекди. Шкафны эшиклерин ачханда, жапханда да Аллахуталаны атын сагъыныгъыз. Андан чыгъарылгъан сауутха аш салгъынчы, суу бла чайкъагъыз. Алай онг болгъанына кёре, шкафда сауутланы башлары да жабылсала игиди. 

Джабирден келген хадисде уа былай айтылады: «Мухаммад (АСБ): «Жукъларны аллында битеу чыракъланы ёчюлтюзюз эмда эшиклени жабыгъыз…» -дегенди. (Аль Бухари). Андан ары уа башында сагъынылгъан хадис къайтарылады.

Хурметли дин къарындашларым бла эгечлерим! Аллах барыбызны да аман ишледен кери этсин, къыйын аурууладан сакъласын, Мухамматны айтханына сыйыннганладан этсин.