Жерлешлерибизни проектлерине кёпле эс бургъандыла

Кёп болмай Москвада  «Сколково» технопаркда  «Ачыкъ инновацияла» деген тогъузунчу  халкъла аралы  форум болгъанды.  Быйыл ол биринчи кере онлайн  халда ётгенди. Анга  Къабарты-Малкъар къырал университетни келечилери да къатышып полимер материалла бла байламлы  къыйматлы инновация проектлерин кёргюзтгендиле.  Аны юсюнден бизге  вузну пресс-службасындан билдиргендиле.

Бу жол форум «Биз дунияда тюрлениулеге хазырбызмы?» деген темагъа жораланнганды.  Биринчи кюнде пандемияны кезиуюнде  социал эм экономика бёлюмню, технологияланы айнытыу  эмда башха  проблемаланы    бизнес, жамауат институтла,  власть органла бирлешип тамамлау  онгланы  сюзгендиле.    Экспозицияла  бла аны сайтында къарагъанды, ол санда  бир тюрлю сорууу болгъан  аны спикерлеге чатда  бералгъанды.

Тюбешиуню ача, «Сколково Форум» организацияны таматасы   Екатерина Иноземцева конференция  онлайн-халда ишлегени   бизни жашауубуз тюрлене  «цифрагъа» кече  ала баргъанына  энтта да бир кере шагъатлыкъ этеди,  дегенди.   Бу жол белгили спикерлени санында РФ-ни Правительствосуну Председателини    орунбасары Дмитрий Чернышенко, Сингулярность жаны бла университетни къурагъан эмда ректору Рей Курцвейл, «Северсталь» компанияны директорларыны советини председатели Алексей Мордашов, Израильни илму эмда технологияла жаны бла министерствосуну башчысы Шай-Ли Шпигельман, The Coca-Cola Company биригиуню европалы регионда   айнытыу жаны бла таматасы Тереза Ноорландер эм башхала къатышхандыла.

РФ-ни  Илму эмда бийик билим бериу министерствосуну «Россейде 2014–2020 жыллада илму-технология комплексни айнытыуда къыйматлы  тинтиуле эм разработкала» деген экспозициясында   институтланы, вузланы алимлери кеслерини къыйматлы  проектлерин кёргюзтгендиле. Ол санда КъМКъУ-ну «Полимат»- прогрессив материалла эм  аддитив технологияла жаны бла араны келечилери да  промышленностьда,  медицинада эм башха бёлюмледе хайырланыргъа жарагъан  полимерледен аберилерин  кёргюзтгендиле.

- Пандемия бла байламлы быйыл кёрмючге алай кёп  адам келмегенди. Болсада бизни  экспозициябызгъа эс бургъанла уа аз болмагъандыла. Аланы асламысы, продукциябызны жаратып, арада байламлыкъла къураргъа излегенле эдиле. Ол себепден кюн ортагъа окъуна билдириу брошюраларыбызны юлешип тауусханбыз эмда ондан артыкъ келишим болдургъанбыз-, дейди  «Полимат» араны     лаборанты Хасан Мусов.