Токну къоранчларын азайтыуну къолгъа алгъандыла

«Россети Шимал Кавказ» компания электрокюч сетьледе къоранчланы азайтыуну  программасын толтуруп  башлагъанды. Компанияны бизни республикада бёлюмюнден билдиргенлерича, аны чеклеринде Къабарты-Малкъарда, Къарачай-Черкесда, Чеченде, Шимал Осетияда, Дагъыстанда эмда Ингушетияда  тийишли мадарла  этилликдиле.

Программагъа кёре энергетикле 0,4 кВ кючлю ток ызланы пластмасса бла тышланнган ызлагъа алышындырлыкъдыла. Дагъыда электрокючню эсеплеген «акъыллы» приборла орнатырыкъдыла. Ала ток эсеплени  абонент службалагъа кеслери жибераллыкъдыла. Бу ишлени тындырыргъа себепликге деп бригадалагъа 362 машина берилликди.

Сетьлени жангыртыу эмда счётчиклени орнатыу ишле Дагъыстандан къалгъан республикаланы барында да бардырыладыла. Анда да жууукъ кезиуледе мадар этип тебирерикдиле. Ишле ток бегирекда къайсы жерледе «тас» бола эсе  биринчи  анда барадыла. Битеу да 575 прибор орнатыллыкъды. Ол санда Къабарты-Малкъарда – 40 мингин.

«Бу программаны болжалы 2024 жылны ахырына дериди. Алай биз а аны эм кёбюсю – эки жылны ичинде тындырып бошаргъа таукелбиз. Нек дегенде иш не къадар терк этилсе, ток бла жалчытыу  да ол къадар иги боллукъду», - дегенди «Россети Шимал Кавказ» компанияны башчысы Виталий Иванов.