«Болгъан затланы сакълай, келир заманны къурайбыз»

Къарачай-Черкес Республиканы Доммай тийресинде  "Болгъан затланы сакълай, келир заманны къурайбыз" деген  ат бла  регион  форум ётгенди. Тёрт кюнню ичинде баргъан форум  ёсюп келген тёлюню патриот ниетледе, ариу  къылыкълы  болуп жашаргъа кереклисине  эмда культура-жарыкъландырыу жаны бла юйретиуге  жораланнганды. Ол  дагъыда бир огъурлу жумушну толтургъанды:  Уллу Ата журт урушха эмда андан бери жыллада бола келген къазауатлагъа къатышханлагъа,  альпинизмни эмда тау туризмни ветеранларына, къыйын болумгъа тюшген юйюрлеге  адрес болушлукъ этиуге жораланнганды.

Форумну къураугъа Къарачай-Черкес Республикада Афганистан урушха къатышхан  ветеранланы  "Наследие"  Россей союзу,  Къарачай шахар округну администрациясы,  Дуния артий комитет,  "Достойная память" халкъла аралы жандауурлукъ  фонд,  Россейни альпимнизмден федерациясы, сабий спортну альпинизмден эм тау туризмден  "Шаулис"  клубу  тири къатышхандыла. Бу ишни культура-жарыкъландырыу жанына уа  Россейни кёп регионларындан  келечиле тийишли юлюшлерин къошхандыла.

Форумгъа къатышханла Клухор ауушда  Доммайдан жыйырма километр арлакъда Уллу Ата журт урушну кезиуюнде  Кавказны къоруулай жан берген аскерчилеге жоралап, эсгертме орнатхандыла.