Приёмгъа жазылыу – электрон халда

Россейни  Сюд приставларыны Федерал службасыны  Къабарты-Малкъарда управлениясыны  башчысы  Бауаланы Ахмат  республиканы газетлеринде, телевиденияларында эмда радиода  ишлеген  журналистле бла  бу жолгъу тюбешиуюнде   гражданланы приёмгъа къалай аллыкъларын  эмда  ФССП-да электрон сервислени ишлерини юсюнден  айтханды.

Тамата сюд пристав  билдиргеннге  кёре,  Къабарты-Малкъарда  сюд приставла шёндюгю  эпидемиология болумлада гражданланы, организацияланы  келечилерин приемгъа  алыуну "Запись на приём" сервисни  юсю бла  алгъадан жазылыугъа кёре тамамлагъанларын билдиргенди. Сервис управленияны энчи сайтындады. Керек болса, ким да аны ачып, жазылыргъа, алай бла  сорууун берирге да  боллукъду.

Алгъадан жазылыргъа  ыразылыгъы болгъан адам отуз кюнню ичинде приёмгъа тюшеди.  Сервис онлайн низамда ишлегени себепли, башха адамла бла сёлешген кезиуде бир кесекге эркин болмазгъа да боллукъду.  Алай болса, сервис приёмгъа алыуну  башха заманын кёргюзтюрюкдю. Жазылыуну  формасы толтурулса, биргенге къаллай документлеринг болургъа кереклиси да билдириледи. Приёмгъа келлик  заманны кёргюзтгенден сора энчи талон жарашдырылады,  анда заявление жазгъаннга бёлюннген кюн, сагъат эмда  ол не сылтау бла  келгени  кёргюзтюледи.

Энчи приём бардырылгъан  заманда  коронавирус инфекцияны жаймауну амалларын хайырланыу эсге алынады. Къысхасы:  приёмгъа келген адамны маскасы, энчи къол къаплары да болургъа керекдиле. Гражданланы приёмгъа алыуну кезиуюнде  битеу санитар-эпидемиялы амалла сакъланадыла.

Андан сора да,  управленияны оноучусу айтханнга кёре, гражданла эм организацияланы келечилери  алагъа керекли сорууну жазып жиберирге да боллукъдула. Аллай корреспонденциягъа деп, управленияны  хар бёлюмюнде  энчи кёчюрюлюучю орунла орнатылыпдыла.