Элле таза суу бла жалчытылынырча

Кёп болмай черек районда «Экология» миллет проектни чегинде бардырылгъан  «Таза суу» федерал  проектге кёре таза   суу баргъан быргъыланы жангыртып башлагъандыла, деп билдиредиле  муниципалитетни пресс-службасындан. Къашхатауда, Бабугентде, Бызынгыда эм Огъары Малкъарда да  суу ызланы тап халгъа келтирирге онг этиледи.

Бюгюнлюкде Къашхатауда «Юго-западный» микрорайонда 2510 метр чакълы жерге къыстау   быргъыла тарта  турадыла. Аны бла бирге от ёчюлтюучю гидрантла бла энчи къуюла да  салынадыла.  Жууукъ заманда  Бабугентде Чочай, Улбаш улу эм Кажежева орамлада 1877 метр чакълы участокда  быргъыланы алышырыкъдыла.   Огъары Малкъарда да Къазакъ,Уммай, Мисир, Батча, Хучина эм Геля улу орамлада  да  3957 метр чакълы жерде таза суу чурумсуз келирча  этилликди.  Бызынгыда  Осман, Байсолтан, Жазикой улу, Комсомольская, Молодёжная, Холам  орамлада  3516 метрде жангыдан  суу ыз тартыллыкъды.​

Ишлени саулай быйыл декабрьни ахырына дери  бошар муратлыдыла.