Адам эм закон

Уллу кёллюлюк этгенди

Быйыл 13 августда ингирде 19 сагъатда прохладначы  эсирип болгъанды. Ол юйюнде отоуладан биринде, уллу кёллюлюк этип, кесини жыл жарым толгъан баласыны къоркъуусузлугъуну юсюнден сагъыш этмей, отну жандыргъанда хайырланылгъан суусун затны сабий жетерча жерде къоюп кетгенди.  Эр киши анга эс да бурмай, юй жумушла бла кюрешип тебирегенди. Сабий шешаны алып, андан ичгенди. Алайда аны хали къыйыннга кетип,   саулукъ сакълау учреждениягъа жетдирилгенди. Алай аш урунуна химиялы заран салынып, бала ауушханды.

Прохладначыгъа Россейни УК-сыны 109-чу статьясына кёре терслеу материалла жарашдырылгъандыла – билмей, сунмай тургъанлай адамны ёлтюргени ючюн. Бу кюнледе уа РФ-ни Следствие комитетини КъМР-де следствие управлениясыны келечилери аны тинтип бошагъандыла эмда сюдню къараууна бергендиле.

Жалгъан диплом бла ишлегенди

Нальчикни прокуратурасы орта профессионал билими болгъаныны юсюнден жалгъан дипломну хайырланнган тиширыугъа   ачылгъан уголовный ишни тинтип, аны къабыл кёргенди.

Белгили болгъаныча, терсленнген ишге кирир мурат бла Шимал Осетия-Аланияны медицина колледжини бошагъаныны юсюнден жалгъан документни сатып алгъанды.

Тиширыу Республикалы сабий клиникалы больницада физиотерапевт бёлюмде медсестра болуп 8 жыл ишлегенди. Ол сюдде терслигине женгдиргенди.  Сюд къырал терслеучюню тюзге санап, ишеклини эркинликлерине чекле салгъанды.