Мирзеулюк битимледен бай тирлик сакълайдыла

Быйыл Къабарты-Малкъарны сабанчылары 1,2 миллион тонна мирзеу жыяр муратлыдыла. Былтыр бу заман бла тенглешдиргенде, ол  8 процентге  асламды, деп билдириледи КъМР-ни Эл мюлк министерствосуну пресс-службасындан.  

Озгъан жети айгъа республика  17,7 миллиард  сом багъасы  эл мюлк продукция сатханды. Ол  былтырдан   3,6 процентге асламды.    

-Къыйын хауа болум жунчутур ючюн къоймагъанына да  къарамай, быйыл мирзеуню бар тюрлюсюнден 1,2 миллион тонна  неда  8 процентге аслам, алыр муратлыбыз,- дейди КъМР-ни эл мюлк министри Хасан Сижажев.

Белгилисича, бу кюнледе республиканы районларында  нартюхню оруу къыстау барады, Чегемде  быйыл  аны   9 минг гектарда салгъандыла. Чууакъ кюнлени ычхындырмаз ючюн  Нартанда  «АРД-М»   бла Чегемде «Шэджэм»  биригиуле бирси мюлкледен тирирек  болуп,  ишлерини асламысын тындыргъандыла.  

Саулай айтханда  нартюх  650 гектарда орулгъанды, андан 3347 тонна тирлик жыйылгъанды, хар гектардан  51 центнер алыннганды.