Жангы танышыны машинасын сюрюп кетгенди

Россейни МВД-сыны Прохладныйдеги муниципалла аралы бёлюмюне 32-жыллыкъ чеченли жаш тарыгъып келгенди. Ол айтханнга кёре, бери къонакъгъа келип тургъанлай, эки жаш бла танышханды. Ала андан керекли жерлерине элтирин тилегендиле. Аланы  элтип бара тургъанда, жолда тохтап, бир кесекге бир жанына кетгенлей, жашладан бири аны машинасын сюрюп кетгенди.

 Полициячыла олсагъат битеу постлагъа урланнган автомобильни номерлерин билдиргендиле. Бир ненча сагъатдан Нальчик-Майский жолда аны  Урван районну гаишниклери эслегендиле эмда ызындан болгъандыла. Ала уручугъа машинаны тохтатса иги боллугъун бир ненча кере эсгертгендиле, алай ол аланы айтханларын къулагъына да алмагъанды.

Бу ишге  Чегем районну жол-патруль службасыны эмда МВД-ны Нальчикде управлениясыны келечилери да къошулгъандыла.  Полициячыла,  бирге болуп, машинаны жолда жюрюгенлеге къоркъуу салып сюрюп баргъан бузукъчуну Нальчикде Ногмов эмда Шогенцуков орамла бирге къошулгъан жерде тохтатхандыла. Уручу къарагъачдан 31-жыллыкъ жаш болгъанды. Ол ары дери да уручулукъ эмда талауурлукъ этгени ючюн кёп кере тутулгъанды.

Ышаннганны багъасы – 105 минг сом

  17 августда Россейни МВД-сыны Нальчикде Управлениясыны дежурный бёлюмюне 56-жыллыкъ киши  келип, аны банк картасындан 105 минг сом урланнганына тарыкъгъанды.

    Полициячыла тохташдыргъанларына кёре, нальчикчи кишиге биреу сёлешип, банкны къоркъуусузлукъ бёлюмюнде ишлейме, ахчагъызны хыйлачыладан сакълар мадарла этеме деп, ётюрюк айтып, картасыны шартларын билдиририн тилегенди.  Аланы алгъандан сора уа  анда болгъан битеу ахчаны кесине ётдюргенди.  Бу хыйлалыкъгъа кёре уголовный иш ачылгъанды.

   Полициячыла жамауатны сакъ болургъа чакъырадыла. Банклада ишлегенле клиентлеринден карточкаларыны шартларын  бир заманда да сурамагъанларын эсгертедиле.

Жашла жыйрыкъланы урлагъандыла                                       

17 августда Россейни МВД-сыны  Нальчикде Управлениясына  37-жыллыкъ тиширыу тарыгъып келгенди. Ол  Пачев орамда орналгъан тюкенледен бирини иесиди.  Аны тюкенине ол танымагъан экеулен кирип, сатыла тургъан 12 жыйрыкъны алып кетгендиле. Анга  36 000 сомгъа заран салыннганды.

   Управленияны 1-чи уголовный-излеу бёлюмюнде къуллукъ этгенле бу ишни терк окъуна къолгъа алгъандыла. Видеокамералагъа да къарап, экеуленнге ишекли болуп, аланы тутхандыла.  Аладан бири Нарткъаладан, экинчиси Нальчикден болгъанлары, алагъа 20-шар жыл толгъанлары ачыкъланнганды. Ала этген аманлыкъларына женгдиргендиле. Алагъа уголовный иш ачылгъанды.