Жер участкаланы чеклерин тохташдырыуну юсюнден

Жер юлюшлени чеклерин нек  тохташдырыргъа керекди? Аны тындыргъанда,  къаллай документле изленирге боллукъдула? Шёндюгю осал эпидемиология болумда ишни чырмаусуз тамамларгъа онг бармыды? Ма бу  эмда башха соруулагъа Федерал кадастр палатаны специалистлери жууап бередиле.

Жер юлюшню чеклери

Жер юлюшню чеклерин тохташдырыу аны иели мюлкча алай кёрюрге амал береди. Аны себепли ол борчлу халда этилирге керекли жумушду. Чекле межевой планда кёргюзтюледиле. Аны бла бирге жеринде да тохташдырылыргъа боллукъдула. Аны барыны да амалы бирди – координатланы белгилеу.

Каадастр жумушла

Межевание деп жер участканы чеклерин белгилеу бла байламлы инженер-геодезия ишлени барына да айтадыла. Бу ишни кадастр инженер тындырады. Ол чекле къалайда болгъанларын жик-жиги бла тохташдырады, участканы уллулугъун тергейди, къоншула бла келишиулюкню да боюнуна алып, ахырында межевой планны жарашдырады.

  Кёп чурумладан къутулады

Участканы чеклерин тохташдырыу жер бла байламлы къачан эсе да бирде чыгъаргъа боллукъ юридический чурумладан къутулургъа эмда къорууланыргъа онг береди.  Сёз ючюн, къоншула бла даулашла болсала неда участкада соргъан - сурагъан этилмей абери ишленсе.

Дагъыда участканы чеклери бегитилип болсала, аны бла сатыу-алыуну неда башха жумушланы женгил тамамларгъа боллукъду. Кесигиз сагъыш этигиз, ким сатып алыргъа сюерикди чеклери жик-жиги бла белгиленмеген жерни.

Жер ючюн налог аны уллулугъуна кёре тергеледи. Тийишли информация ЕГРН-де сакъланады. Кадастр инженер участканы хар несин да межевой планнга тюшюрсе уа,  аны уллулугъу базада кёргюзтюлгенден башха болургъа боллукъду. Ол а жерни кадастр багъасы, налогу да ары дери терс тергелип тургъанларын кёргюзтюрюкдю. Алай болмаз ючюн бу ишни заманында этсе игиди.

Энтта да бир сылтау: участканы бёлюрча аны чеклерин тохташдырмай боллукъ тюйюлдю.

Бирикген къырал реестрде (ЕГРН) не шартла   бардыла?

Жеринден тепдирилмеген мюлкню юсюнден битеу информация ЕГРН-ден алыннган къагъытда кёргюзтюледи. Анда чеклени юсюнден абери жокъ эсе,  «Участканы чеклери тийишли законодательствону излемлерине кёре тохташдырылмагъандыла» деген белги салынады. Аны уллулугъу уа иеликге шагъатлыкъ этген къагъытдача алай боллукъду.

Дагъыда ЕГРН-де участканы чеклерини координатлары нормативге тийишлисича алай тюз тохташдырылгъан эселе, аны къайтарып жангыдан тергеп айланыргъа кереклиси жокъду. Аны жаланда реестрде халатла табылсала этерге керекди.

Керек болса,  «Публичный кадастр карта» деген сервисни хайырланыргъа боллукъду. Анда жер участканы адреси бла бек женгил табар амал барды. Алай объектни юсюнден билдириуде «Чеклени координатлары жокъду» деген белги бар эсе,  неда аны уллулугъу иеликге шагъатлыкъ этген документдеча алай эсе - чеклени тохташдырмай боллукъ тюйюлдю.

Бу магъаналыды! Кадастр картагъа къарагъан кезиуде сакъ болугъуз: анга ушашлы жалгъан сайтла болгъанын билигиз. Сервисни  тюз адреси ма буду: pkk.rosreestr.ru.

Выписка алыр ючюн МФЦ-гъа неда Кадастр палатагъа барып заявление берирге боллукъду. Бу жумушну юйден чыкъмай тамамлар ючюн а Федерал кадастр палатаны сайтын (https://spv.kadastr.ru/) неда Росреестрни официальный порталын (http://www.rosreestr.ru/) хайырланыргъа боллукъсуз. Электрон халда берилген выписка электрон халда къол салынып болуучуду.

Специалист тохташдырыргъа боллукъду

Чеклени тохташдырыу деп кёп ишлеге айтадыла. Аланы барын да жаланда анга эркинлиги болгъан специалист тындырыргъа боллукъду – ол кадастр инженерди. Аны себепли жерни иеси биринчиден аны бла тюбеширге керекди. Бюгюнлюкде ишни къайсылары тындырыргъа эркин болгъанларыны тизмесин тийишли реестрде (https://rosreestr.ru/wps/portal/ais_rki) табарыкъсыз. Специалистни сайлагъанда аны сынамына, кадастр ишлени къаллай бир заманны ичинде этерге къолундан келгенине да къарагъыз.

Ызы бла  аны бла келишим этилгенден сора  специалист жерине барып, участкада тергеуле бардырады. Хуна бар эсе, ол ишни андан башлайды. Ол жокъ эсе уа мюйюшлени жерге таякъчыкъла уруп алай кёргюзтюрге керекди. Аны этгенден сора иш бла шагъырейленип, къоншула бла келишип башларгъа тийишлиди.

Чеклени тохташдыргъанда,  талай жорукъланы сансыз этерге жарамайды. Ала, сёз ючюн, элни неда муниципалитетни чеклеринден тышына чыгъаргъа, къоншуланы жерлерине да кирирге жарамайдыла. Аны барын да этгенден сора координатла да тохташдырылып межевой план жарашдырылады.  

Къаллай документле изленедиле?

Кадастр инженер жерни чеклерин аны иеси къалай сюе эсе да алай эталлыкъ тюйюлдю. Ишни башлардан алгъа аны къолунда ол участканы документлери болургъа керекдиле.

Законодательствода айтылгъаныча, чеклени тохташдырыу иш жер юлюшге иеликге шагъатлыкъ этген документледе айтылгъаннга кёре бардырылады. Аны бла бирге ары дери берилген къагъытла да хайырланыргъа боллукъдула. Аллай зат жокъ эсе уа, ишни 15 эм андан кёп жыл алгъа бегитилген чеклеге кёре башларгъа боллукъду.

РФ-ни Экономиканы айнытыу министерствосуну жеринден тепдирилмеген мюлкню Департаментинде айтханларыча, аллай къагъытха: БТИ жарашдыргъан техпаспортда кёргюзтюлген ситуационный план, жер-жерли власть, архитектура, къурулуш неда жашау журт органлада болгъан план-картография материалла, муниципалитетлени планлары, дача, терек бахчачылыкъ эмда башха (коммерциялы болмагъан) биригиулени тийрелеринде къурау эмда къурулуш бардырыу проектле саналыргъа боллукъдула.

Бу магъаналыды: чыгъарылгъан заманда эмда ол жерде законодательствону излемлерине келиширге керекдиле документле.

 Къоншула бла  келишиу?

Участканы чеклерин тохташдырыу – ишни бир кесегиди. Ызы бла аланы юсюнден къоншула бла да келиширге тюшерикди. Аны этер ючюн кадастр инженер алагъа почта бла неда электрон адреслерине билдириу жиберирге керекди. Участкаланы иелери табылмай эселе, билдириу газетде басмаланады. Ала аны окъусала, окъумасала да башхасы жокъду – аны бла ол этилген ишге саналады.

Къоншу участкаланы иелери ыразылыкъларын келишиулюк актха къол салып билдирирге керекдиле. Арада ангылашынмагъан зат (дау) бар эсе, аны юсюнден ала кадастр инженерге къол бла жазып билдирирге керекдиле. Ол ызы бла сагъынылгъан актда кёргюзтюледи эмда межевой планнга къошулады.

Иеликни регистрациясын этген орган ол даулауну тюзге санаса, учёт-регистрация иш тыйылады. Къоншулагъа уа тюзлюкню сюдде тохташдырыргъа тюшерикди. Анда межевание бла кюрешген кадастр инженерни да чакъырып оюмун сорургъа боллукъдула.

Чеклени тохташдыргъан кезиуде арада келишиулюк табылса  барындан да игиси олду. Нек дегенде  быллай ишле сюдде къыйын, кеслери да узакъгъа  созулгъан аллай болуучудула.

Къыйын эпидемиология болумда

 Кадастр инженер ишин кеси оюмуна кёре хар къоншу бла энчи тюбешип неда бары бла да келишип, аланы бир кюн жыйып тындырыргъа эркинди. Сёзсюз, быллай эпидемиология болумда сакълыкъны юсюнден унутургъа жарамайды.

Жеринден тепдирилмеген мюлкню къырал реестрине документлени МФЦ-гъа барып берирге, сора дагъыда Росреестрни интернет-сайтына кирип   жиберирге боллукъду. Сюйсегиз а Кадастр палатаны адамларын жерине чакъырып алай тындырыр амал барды. Заявканы https://kadastr.ru/services/vyezdnoe-obsluzhivanie/ сайтда берирге тийишлиди.