Жыл саныбыздан таматаракъ кёрюнюрге жаланда тютюн, ичги, кёп ашау сылтауду деген оюм ол терсди. Бир-бирде таматаракъ кёрюнюрге былай къарагъанда бош къылыкъла да себеплик этип къояргъа боладыла. Аланы къурутсагъыз, билине -билине жашыракъча боллукъсуз.
1. Кёзлени жумуу
Кёзлени къатларында терен жыйыртмакъла къалай чыкъгъанларын биз бирде эслемей къоябыз. Ол а кёз къабакъланы (веки) терисини тыкъ кючлюлюгю (упругость) селейгени бла байламлыды. Аны сылтауу уа кёбюсюнде кёзле къамагъанда, аланы жумуп турургъа юйренчекликди, дейди дерматокосметолог Надежда Червинская.
Терини осаллыгъына келтирген ол къылыкъны бир ненча сылтауу барды:
жууукъдан кёрюуге жарагъан, алай терс сайланнган кёзлюкле (неда аланы жюрютюрге сюймеу). Ол заманда адам ууакъ затчыкъланы иги кёрюр ючюн кёзлерин жумуп турургъа керек болады. Заман оза баргъаны бла бу аны къылыгъына бурулуп къалады;
кюнден къоруулагъан кёзлюклени хайырланмау. Бютюнда суу жагъасында.Ультрафиолетни хатасындан терибиз терк жыйыртмакъ болады, бютюнда кёз тийреледеги жукъасы. Биз жарыкъ кюнчюкден кёзлерибизни жумсакъ, ол жыйырылгъанчыкъла терибизге сингип къалгъанчадыла.
Терини тап халда тутарча коллаген бла кремле эмда женгил гимнастика (къарамны солдан онгнга, онгдан солгъа, энишге – ёрге бургъан) болушурукъдула.
2. Тохтамагъанлай чайнап туруу
Тохтамагъанлай бир зат чайнап неда чёплеу чёплеп туруу жаланда аш эритиу системагъа угъай, бурунну бла эринлени тийирелеринде териге да хайырлы тюйюлдю – сингирле созулуп, аланы кючлюлюклери эркинирек бошланып, жыйыртмакъла къураладыла.
Алай бла чёплеу ууучну неда чертлеуюклени къолугъузгъа къуярдан алгъа бираз сагъыш этигиз. Нерваларыгъызны тынчайтыргъа аладан эсе женгил гимнастика бла терен-терен солуп жайыкъгъан ахшыды.
3. Терини ышыу
Хау, терибиз замандан заманнга тазалауну излейди. Алай бу жаны бла артыкъ кюрешиу да иги тюйюлдю. Скрабланы ыйыкъгъа бир кереден кёп хайырланса, ол эпидермисге заранлы болады. Тери жукъгъан аурууланы терк тутаргъа боллукъду, кюнде кюйген да (загар) ариу бир тюрсюнлю тюшмейди, къартайыу процессле да теркленедиле.
Скрабланы сайлагъанда, эслилик керекди. Боюн тийрелеригизге туз ташчыкълыланы сайламазгъа кюрешигиз. Аллергиялы териге жемиш кислотала киргенлени жакъмагъыз. Терини ууакъ габулугъундан тазалагъандан сора крем жакъмай къоймагъыз.
4. Къыркъ жылгъа дери терини жашлыгъына себеплик этген кремлени хайырланыу
Жаш тиширыуланы эм уллу халатларындан бири – терини жашлыгъына себеплик этген кремлени отуз беш жылларына дери жагъып тебиреудю, дейди Червинская. Хар жыл саннга - кесини косметичкасы. Жыйырма бешге дери женгил тоникле бла кремле (сууукъ кезиуде аланы къоруулау кючлери болгъанлары изленедиле), отуз бешге дери - бакъгъан къарыулары болгъан кремле бла антистресс косметика.
Лифтингле бла жыйыртмакъладан кремлени уа къыркъ жылгъа жете келгенде кийирирге тийишлиди. Ол кезиуде коллагенни чыгъарылыуу азайгъаныны сылтауундан. Косметиканы жыл санына кёре хайырланмау аны терк къартайыууна себепди. Сёзге, эр кишиледе да тюз алайды.
5. Инбашланы энишге бошлау
Энишге бошланнган инбашла бла кёкюрекни тута билмеу 25–жыллыкъланы окъуна абадан кёргюзтеди. Ортопед–травматолог Сергей Горячев хапарлагъаннга кёре, муккурлукъ (сутулость) - ол аурууду. Андан жаланда аркъа сюекге угъай, кёкюрекдеги ич органлагъа да заран тюшеди. Анга тынгылы къаратыргъа керекди эмда энчи сайланнган багъыу физкультура тийишлиди.
Муккурлугъугъуз женгил халда эсе уа, кесигиз да тапландыраллыкъсыз халны. Аркъагъызны сингирлерине эс буругъуз. Стол артында неда машинада олтургъан кезиуюгюзде бу женгил упражненияланы кюннге алты – жети кере тамамлагъыз:
1. Терен солугъаныгъызда: инбашларыгъызны болалгъаныгъызча артха этигиз, иги бюгюлюп, аркъа жиклени кючлеп, кёкюрегигизни алгъа чыгъарыгъыз.
2. Солууну чыгъаргъаныгъызда, инбашларыгъызны тап этигиз.
3. Энди уа инбашларыгъызны къарыуугъуздан келгенича алгъа этигиз, сыртыгъызны да иги бюгюп, алгъа ийилигиз. Алай юч-тёрт кере этигиз.
