Къоркъуулу ауруудан кесигизни сакълагъыз!

Жылы жазны, солуу кюнлени, кюч-къарыу алгъан, иммунитетни кючлендирген, тахта кёгетле, жемишле бишген кезиуню сюймеген, баям, бир жан да болмаз! Жарсыугъа, вируслу Гепатит А эмда чеги ауруула да  бу  айлада аслам жайыладыла. Аладан аурургъа  къоркъуулу къауумгъа кёгетлени, къолланы да таза жуумагъанла, кирли кёлледе жуууннганла, тенгиз продуктланы (сёз ючюн, устрицала, мидияла...) тынгылы къууурмай ашагъанла тюшедиле.

Роспотребнадзорну КъМР-де Управлениясыны специалистлери айтханларыча, вируслу Гепатит А ауруу 35 сутканы ичинде кесин билдиртмей турады. Бир-бирде ол 15-50 кюннге дери къысхартылыргъа неда созулургъа да боллукъду. Адам ол заманда кесин саулукълу сунады, алай тёгерегиндегилеге уа уллу къоркъуу салады. Ауруу алгъа гриппге ушайды, адам къарыусуз болады, къолу, саны тюшеди, юсю къызады, башы, шаугютлери ачып тебирейдиле, кёлю аман этеди, аш оруну эмда онг жанында иегилерини тюбю къыйнайды. Юч-беш кюн озгъандан сора териси, кёз  акълары да саргъылдым боладыла. Ол затланы сезгенлей, тынгылы диагноз этилирча, мычымай врачха тебирерге керекди.

Бу ауруудан адам кесин сакълар ючюн аякъ жолгъа баргъандан сора тышындан юйге киргенде, азыкъ ашарны аллында да къолланы сапын бла тынгылы жууаргъа керекди! Дагъыда кёгетлени, жемишлени иги тазаларгъа эмда исси суу бла чайкъаргъа. Сатып алыннган продуктланы хайырланыргъа боллукъ заманына дайым эс бурургъа, бузулгъан болур деген ишеклик туудургъан ашланы да ашамазгъа. Кёлледе жуууннганда суу жутмазгъа кюреширге, сабийлени уа гитчеликлеринден окъуна тазалыкъгъа юйретирге тийишлиди.