Елизавета патчахдан – салам

Орскдан окъуучу, белигили адамлагъа къагъытла жазып, мухурларын жыяды, аланы саны 100-ден атлагъанды. Бу кюнледе уа анга Великобританияны патчахы Елизаветадан къагъыт келгенди.

Орскдан тогъузунчу классны окъуучусу Иван Ворожейкинни сейир итиниулюгю барды  - ол белгили адамланы мухурларын жыяды. Алай Монеточканы неда Бастаны белгилерин излеген тенглерине ушамай, Иванны коллекциясы политиклени бла президентлени мухурларындан толупду, бу кюнледе уа алагъа патчах Елизавета къол салгъан къагъыт къошулгъанды.

Елизавета II окъуучу жайда солугъан заманында ингилиз тилде кесини бла жууукъларыны, къаллай иш сюйгенини, шахарыны юсюнден жазгъан эди. Британ породалы Стеша киштигин окъуна сагъыннганды. Бир ненча айдан а Букингем мекямдан анга жууап келгенди. Анда былай айтылады: «Багъалы Иван, патчах мен сизге жазарымы излегенди, ол ийген къагъытыгъыз ючюн сизге ыразылыгъын билдиреди. Жарсыугъа, ол кеси жазалмагъанды, алай ингилиз тилге юйреннгенигизге уа бек къууаннганды». Къагъытны тюбюнде фрейлина шакъа бла мухурун салгъанды. Къагъыт бла бирге уа патчахны жашау жолуну бла Букингемде жашагъан жаныуарланы юслеринден брошюрала да келгендиле.

Белгили адамлагъа письмола ийип, аланы мухурларын жыйып Ваня эртте башлагъанды. Биринчи къагъытын ол ючюнчю классда болгъанында жибергенди, бюгюнлюкде аны коллекциясында Германияны канцлери Ангела Меркельни, Чехияны, Словакияны, Венгрияны, Францияны президентлерини, айтхылыкъ спортчула Владислав Третьякны, Елена Исинбаеваны эм башхаланы мухурлары бардыла. Окъуучу алагъа Владимир Путинни мухуру да къошулуруна мурат этеди.

- Бир ыйыкъ мындан алгъа Президентни администрациясына жазгъанма, энди андан жууап сакълайма, - дегенди Иван.