Санаторийлени иши къыйыныракъ болгъанды

Озгъан айда Роспотребнадзор санатор-курорт учрежденияланы ишин къурау жаны бла рекомендацияла берген эди. Ол излемлени юсюнден оюмун «Маяк» санаторийни башчысы, «Иш кёллю Россей» жамауат организацияны Къабарты-Малкъарда бёлюмюню келечиси Мамайланы Галина билдиргенди.

«Ведомствону ол эмда ызы бла аз-маз женгилирек этилген къошакъ излемлери бла биз, сёзсюз, тынгылы шагъырейленнгенбиз. Саулай айтханда, аланы барын да толтурур амал барды. Алай дагъыда эс бурургъа тийишли энчиликлени юсюнден айтыргъа сюе эдим», - дегенди ол.

Ол рекомендациялагъа кёре санаторийлеге жаланда коронавирус инфекциягъа жукъмагъанланы алыргъа болады. Анга шагъатлыкъда ол адам ары дери тийишли тест берирге керекди эмда солуу учреждениягъа келирни аллында эки ыйыкъны ичинде ауругъанла бла шагъырей болмазгъа.

«Къыралда болгъанны эсге алып айтсакъ, ол тюз излемди. Мен оюм этгеннге кёре, анга не учрежденияла, не солургъа келгенле угъай демезге керекдиле. Ол бары да жаланда адамланы къоркъуусузлугъун жалчытыргъа деп этилгенди», - деп белгилегенди Мамайланы Галина.

Дагъыда Роспотребнадзор санатор-курорт учреждениялада отоулагъа жашаргъа жаланда бирер адам къояргъа чакъырады. Бир юйюрдегилени эмда болушлукъчуланы санамай.

«Солургъа келген адам аллындан окъуна бир жери болгъан отоуда турурча путёвка алгъан эсе, учреждениягъа ол хазна чырмау боллукъ тюйюлдю. Алай алгъын этилген къырал контрактла бла келип башласала уа солугъанла, ишни тюрлендирирге тюшерикди. Сёз ючюн, пандемия башланнгынчы санаторий быллай келишим бла эки жюз адамны алыргъа керек эди. Белгиленнгенича, къонакъла номерледе экишер-экишер турлукъ эдиле. Шёндюгю болумда уа бир кезиуге аллай бир адам алыр амал жокъду. Аны ючюн аланы аз-аз чакъырыргъа, алгъын этилген келишимлени да болжалларын созаргъа неда арталлыда (бир кесегин неда толусунлай) толтурмай къояргъа тюшерикди. Къоранчла уа санатор-курорт учрежденияланы юслерине таянырыкъдыла», - деп къошханды санаторийни башчысы.

Мамайланы Галина оюм этгеннге кёре, путёвкала ачыкъ халда сатылгъанда, къошакъ къоранчланы аланы багъасына къошаргъа болады. Алай къырал келишимлени юсюнден айтханда уа, аланы багъалары бир тюрсде турады, кеслерин да тюрлендирир амал жокъду. Аны ючюн а шёндюгю къоранчланы барын да учреждениялагъа жабаргъа тюшерикди. Ол а аланы ишини файдалылыгъын иги да азайтырыкъды неда жокъну орунуна келтирликди.