Къол кётюрюу къоркъуусузлукъну жорукълары санитар излемле сакъланып бардырыллыкъды

1 июльда РФ-ни Конституциясына тюзетиуле кийириу жаны бла къол кётюрюу бардырыллыкъды.  Бу статьяда уа пандемияны кезиуюнде айырыу низамгъа къаллай жангычылыкъла кийирилгенлерин ангылатыргъа сюебиз.

Айырыу участкалагъа келгенде биргенге не зат алыргъа тийишлиди? Бек алгъа – паспортну. Къол кётюрюрге келгенле маскала, къол къапла бла жалчытылынырыкъдыла.  РФ-ни Ара айырыу комиссиясыны башчысы Элла Панфилова журланистлеге айтханыча, участкалагъа кирген жерледе вирусну къыргъан энчи кюйюзчюкле боллукъдула. Алагъа тургъанда чурукълада   битеу микробла ёлтюрюллюкдюле. Андан ары айырыучуну къолларын тазаларгъа онгу боллукъду.

Комиссияны келечиси неда волонтёр келгенлени температураларын ёнчелерикдиле, ызы бла алагъа маскасы, къол къаплары эм къаламы бла пакетле берилликдиле.
Жангы жорукълагъа кёре, паспорт къолдан къолгъа берилмейди. Комиссияны келечисине документ берилмейди, аны ачып, эки метр узакълыкъдан кёргюзтюрге керекди. Ол а адамла  бир бирлери бла не къадар аз тюбер мурат бла этиледи.  

Отоуда бир кезиуде кёп адам жыйылса, жангы жорукълагъа тийишлиликде ала бир бирден 2 метр кенгликде турургъа борчлудула. Участкалада сюелирге жарагъан жерледе энчи ызла тартылыпдыла.  Кабинкалада жабыу боллукъ тюйюлдю, ол да вирус жукъмаз мурат бла кетерилгенди. Алай инсанны оюмун башхала кёрлюкдюле деп къоркъур кереклиси жокъду: кабинкала къабыргъагъа бурулуп салынырыкъдыла.

Андан сора да,  къол кётюрюрге энди келгенле бла кеслерини эркинликлерин толтуруп кетип баргъанла бир бирлери бла тюбеширик тюйюлдюле.  Башхача айтханда, кирген бир эшикден, чыкъгъан а башхасындан этилликди.

Элла Панфилова журналистлеге айтханыча, РФ-ни Конституциясы бла байламлы къол кётюрюуню кезиуюнде адамла бир бирлери бла не къадар аз тюберча битеу къолдан келген этилгенди. Ол санда ангылатыу кампания бардырылгъан кезиуде да. Роспотребнадзор бла бирге регионлада айырыу комиссиялагъа санитар низамны бла жорукъланы   ангылатхан эсгертиуле хазырланнгандыла.  

Айырыу участкаланы асламы, тёреде болгъаныча, билим бериу учреждениялада орнатыллыкъдыла. Къол кётюрюу жерле вузлада, маданият юйледе, сабий садлада, гитче элледе уа жамауат аслам жыйылгъан жерледе, сёзге, клублада, администрациялада къуралгъандыла.

Адамла кёп санда бирге тюбемез ючюн а Конституция бла байламлы сайлауну жаланда 1 июльда угъай, бу кюннге дери ыйыкъны ичинде да этерге боллукъду.

Айырыу участкаланы оноучулары къол кётюрюуге сабийлени келтирмезге тилек этгенди. Алай къагъанакъны къоюп кеталмагъан ата-ана кесини инсанлыкъ борчун толтурургъа сюйгенини юсюнден билдирсе, комиссияны келечилери аны юйюне келирге боллукъдула.

Бу кезиуде да битеу санитар излемле сакъланыллыкъдыла. Комиссияны келечиси, къараучу бла бирге аллай инсаннга юйюне  медицина халат, маска, къол къап кийип келедиле. Ала фатаргъа кирлик тюйюлдюле. Эшикге ичинде маскасы, къол къаплары, къаламы эм бюллетени бла артмакъны тагъарыкъдыла.

Инсан босагъадан чыкъмай, паспортун кёргюзтеди, аланы алып, юйюне кирип, бюллетеньни эмда юйюнде къол кётюргенини юсюнден документни толтуруп, аланы комиссияны келечисини биргесине болгъан энчи кюфге атады. Алай бла барысы да бир бирлеринден 2 метр узакълыкъда туруп, бир бирлерине къоркъуу саллыкъ тюйюлдюле.

Алгъын комиссияны келечилери жаланда абаданлагъа, саулукъларына кёре чекленнген онглары болгъанлагъа жюрюген эселе, эпидемиология болум бла байламлы бу низам тюрленнгенди, адамлагъа тийишли мадарла этиледиле.

Айырыу комиссияланы келечилерини къоркъуусузлукъларына да энчи магъана бериледи. Алагъа  санитар жорукъла бла эсгертиуле хазырланнгандыла. Ала къол кётюрюуню аллында коронавирус жукъгъанына бла къалгъанына тестле да берликдиле.

Конституция бла байламлы къол кётюрюуню 1 июльда бардырыуну юсюнден оноу медицина эм эпидемиология жаны бла специалистлени эсгертиулерине тийишлиликде чыгъарылгъанды. Ала уа бюгюнлюкде къыралда санитар-эпидемиология болум тапланнганын белгилейдиле, алай бла къол кётюрюу адамланы саулукъларына къоркъуусуз бардырыллыкъдыла.

Болсада Элла Панфилова регионлада болум тюрлю-тюрлю болгъанын чертип, ол эсге алынырыгъын белгилейди.