Доммакъ ёмюрден къалгъан обаланы тасхалары

Белгилисича, Бахсан районда «Куба-Таба-2» обаланы комлексинде  къыстау археология ишле барадыла. Кёп болмай  муниципалитетни администрациясыны башчысы Артур Балкизов да андагъы болум бла шагъырейленнгенди.    

Къазыучуланы таматасы, «ОКН-проект» биригиуню  илму- производство бёлюмюню  келечиси Лариса Нидзельницкая  Артур Балкизовха тамамланнган ишлени, ол санда жер тюбюнде   доммакъ ёмюрню заманындан  къалгъан  аберилени   юсюнден айтханды.  Ала  ауушханны  биргесине асыралгъан   юй керекледиле  эм тиширыула омакълыкъгъа деп  хайырланнган затладыла. Ала   инсанны  даражасын да  кёргюзтедиле.  

Лариса  Нидзельницкая белгилегенича, Бахсан районда адам къолу тиймеген алыкъа  кёп сейир жерле бардыла, ол себепден алагъа  аслам  эс бурулургъа тийишлиди.   Артур Балкизов да алимлени   ишлеринде болушургъа  хазырлыгъын билдиргенди.