Тёгерек-баш жангы излемлеге келиширча

 Черек  районда  "Единая  Россия" партияны  "Шахар тийре" проектини чеклеринде  «Шахарда  болумну игилендириу» деген программа къыстау бардырылады, деп билдиредиле муниципалитетни администрациясыны пресс-службасындан.

Бюгюнлюкде Къашхатауда Шогенцуков атлы орамда -  32-чи, 34-чю,36-чы, Абай улу орамда - 10-чу эм Мечи улу орамда 41-чи, 104-чю, 187-чи номерли кёп фатарлы юйлени арбазларына тынгылы ремонт этип   бошай турадыла. Аны чеклеринде жангы бордюрла саладыла, асфальт жаядыла эм тёгерек-башны жашиллендиредиле. Ызы бла  сабийле ойнарча майданла эм машина сюелирча жерле да ишленирикдиле. Сагъыныгъан ишлеге федерал,  республикалы эм муниципал бюджетледен 4 миллион 917 минг сом бёлюннгенди.   

Программагъа кёре, жууукъ заманда жамауат аслам хайырланнган жерлеге да ремонт этилликди. Ол санда Жемталада  - 1 миллион бла 323 минг сомгъа, Бызынгыда да  523 минг сомгъа жангы Маданият юйлени  арбазларын  жангыртырыкъдыла. Аушигерде  уа 448 минг сомгъа межгитни тийреси айбатландырыллыкъды. Андан сора да, 815 минг сомгъа Черек районнга кирген жерде эсгертмени тийреси тапландырыллыкъды.    

Проектни магъанасы адамлагъа тап болурча  шахар тийиреде болумну игилендириргеди. Эсге сала айтсакъ,  ремонт этилирге керек  объектлени кёбюсюн   жамауат  кеси сайлайды.