Тепенаны юсюнденЭртде заманладан бери да «Тепена» малкъарлыланы сюйген тепсеулеринден бириди. Келигиз, бизни аппаларыбызны кезиуюнде аны къалай жырлагъанларын бла тепсегенлерин къысха тинтейик. Уллу отну къатында тепсеуню бардырыргъа биреу сюеледи. Къалгъанла, ненча болсала да, отну тёгерегине гюрен туруп барадыла. Тепсеу башчы жырны биринчи тизгинин айтып барады. Бирсиле уа экинчи тизгинин, тёредеча, тепсеп, кетип барадыла. Жыр башчыны, гюрендегилени да ауазлары бир бирге келишсе, аламат. Ол эшитгенни, къарагъанны да жюреклерин кётюреди. Тепсеп бошагъандан сора жашла тутушургъа, кючташ кётюрюрге, къурукъгъа минерге къатышадыла. Аллай оюнла эки-юч кюннге дери да бошалмагъанлай баргъандыла. Тепенабыз – оюннга! Биз келгенбиз союмгъа! Тепена уа сыйлыды! Тепенаны кёрюгюз! Онгча, онгча барыгъыз! Солча, солча барыгъыз! Онг аякъны алыгъыз! Тобукъ башха салыгъыз! Ойнайбыз биз – кёлге асыу! Тепенагъа уа – къара суу! Ол заманда шапа аш къанганы келтиреди. Юсюнде уллу къара аякъ, ичи сырадан толу (боза болса да) тёгерегинде баш бишген, эт юлюшле, хычинле, локъумла. Жашла ашап, ичип, жангыдан тепсеп башлайдыла. Аш да, суу да бердиле! Адам кибик кёрдюле! Тепенаны сордула! Тепена уа арымаз! Ойнамайын жарамаз! Тепенаны айтыгъыз! Тепена уа ойнайды! Кючюн аяп къоймайды! Тепенагъа кюч, къарыу! Бу оюнсуз болмагъыз! Ойнасагъыз – оюннга! Бек болугъуз союмгъа! Тепена бла жашагъыз! Тинте кетгенде, миллетде «Тепенаны» бир ненча тюрлюсю жюрюгени ачыкъланнганды. Бу тизгинле Таумырзаланы Зариятдан бла Гадийланы Матгерийден жазып алыннгандыла. Сёз ючюн, халкъ жырчыбыз Отарланы Омар айтыучу жырны сёзлери уа бир кесек башхадыла мындан.
Поделиться:
Читать также:
19.04.2024 - 12:45 →
Огъурлулукъгъа ийнаныуну тас этмей
17.04.2024 - 14:39 →
Ара межгит – ариу жерлерибизден бири
16.04.2024 - 09:26 →
«Ишим халкъгъа хайыр келтирсе сюеме»
15.04.2024 - 10:22 →
«Чепкенлерибизни жаратханла кёп болуп, аланы терк сатып алгъандыла»
09.04.2024 - 10:00 →
Аны жашауун сахна жарыта эди
|