Фатиманы хорламлары

Атмырзаланы Фатима Тырныауузда В. Кузнецов атлы 2-чи номерли орта школда билим алгъанды. Ол кеси заманында «Единая Россия»  Битеуроссей политика партияны Къабарты-Малкъар регион бёлюмюню стипендиаткасы болгъанды. Андан ары окъууун ол Ростовда Экономика университетде бардыргъанды. Эки жыл мындан алда бакалавр дипломун алгъанды, бусагъатда «Банк иш» кафедраны магистрантыды.

Вузда окъугъан жылларында Фатима  бийик жетишимлеге жеталгъанды, ол санда илму тинтиуледе да. Аны ишлери, вуз, регион, халкъла аралы даражалада къуралгъан тюрлю-тюрлю илму-практика конференциялада кёргюзтюлюп, дипломлагъа, сертификатлагъа тийишли болгъандыла.

Андан сора да, Атмырзаланы Фатиманы  илму тюбешиулеге къатышханы, иги окъугъаны, Ростовда  къырал экономика университетни магистратура институтуну бла Ростовда Эл мюлк институтну жамауат эм маданият жумушларына билеклик этгени ючюн аслам диплому бла грамоталары бардыла.  Былтыр ол Ростов областьда «Жылны студенти-2019» регион эришиуню биринчи урумунда хорлагъанды. Къыз дагъыда «2019 жылны эм иги студентлери» шахар эришиуню «Илму-тинтиу ишде жетишимле» номинациясында хорламы ючюн Дондагъы  Ростов шахарны администрациясыны таматасыны дипломуна тийишли кёрюлгенди.

Алгъаракълада уа Фатима «Преподавательле эм иги студентге санагъан» номинацияда хорлап, «Ростовда Эл мюлк институтну алтын страницалары» саугъаны иеси болгъанды.

Суратда: Ростовда Къырал экономика университетни ректору Е.Н. Макаренко Атмырзаланы Фатиманы саугъалагъан кезиу.