КИМГЕ ДА БОЛУШУРГЪА, КИМГЕ ДА ИГИЛИК ЭТЕРГЕ ИТИННГЕН ТАМАТА

Къабартылы халкъны белгили адамларын санай кетсенг, Борис Мазихов Бесланович ол тизмеге киргенледенди. Аны атын, тукъумун республикада кёпле биледиле. Жаш заманындан да ол жазыу иш бла къаты кюрешип келеди. Хапарла, романла, тамсилле, повестьле, пьесала жазгъанды.

Борис 1940 жылда 7  апрельде Шалушкада туугъанды. Ол жашауун чыгъармачылыкъ иш бла байламлы этгенди. КъМКъУ-ни филология бёлюмюн бошагъандан сора, Басманы къырал управлениясында, ызы бла «Ленин гъуэгу» газетде корреспондент, бёлюмню таматасы, жууаплы секретарь болуп ишлегенди. КПСС-ни обкомуну телевидение бла радио бёлюмюне башчылыкъ этгенди.

Жыйырма жылгъа жууукъ заманны ичинде Борис Мазихов «Ленин гъуэгу» газетни баш редактору  болуп тургъанды. Алайда ишлей тургъанлай, Къабарты-Малкъарны Баш Советини депутатына эки кере айырылгъанды. 1981 жылдан 2017 жылгъа дери Къабарты-Малкъар Республиканы Журналистлерини союзуна таматалыкъ этгенди. РФ-ни культурасыны сыйлы къуллукъчусуду. Адыгея эм Къарачай-Черкес республикаланы сыйлы журналистиди. Кёп саугъаланы лауреатыды.

Мен аны бла бирге жыйырма жыл ишлегенме. Ол билимли, ишин сюйген, билген инсандан сора да, адамлыкъ шартларын айтып-айтмазча болгъан аламат адамды. Ишни юсюнде  ишчи нёгерим эсе, андан тышында уа манга аталыкъ, къарындашлыкъ да этип тургъанды. Кесини ёхтем ауазы бла, мени кесини къаршысына санап, ариу сёлешгенин унутсам, жарамаз.

Ол бусагъатда, жыл саны келип, солуудады, алай мен аны кюн сайын ишде бек излейме. Ол белгили жазыучуду, республикада аны китапларын сюйюп окъуйдула.

Бу кюнледе Борисге 80 жыл толады. Аны юсюнден республиканы журналистлерини арасында ариу айтмагъан, анга ыразылыгъын билдирмеген жокъду. Жашау жолунда кимге да болушургъа, кимге да игилик этерге итиниулюгю кимни да эсиндеди.

Ол кесини анасыны юсюнден хапар айтса, кёзю-къашы бир жарый, бир мудах бола тургъаны эсимдеди. Мен аны анасын бир да кёрмегенме,  алай Борисни хапарлары аны манга алай жууукъ этгендиле, мен аны сабийлигимден таныгъанча болгъанма. Аныча анагъа сюймеклигин айталгъан азды. Борисни юй бийчеси Тамара (жаннетли болсун) бир да болмагъанча иги, сабыр, акъыллы, жумушакъ сёзлю, кимге да ариу кёрюнген адам болуучу эди. Ол кёп жылланы Шалушканы школунда устаз болуп ишлегенди, аны себепли аны кёпле таный эдиле, кёп ариу  сёз эшитгенме аны юсюнден. Жукълап, эсинде болмай тургъанлай, юй бийчеси дуниясын алышып, юйюрюн  мудах этгенди.

Борис бла Тамара юч жаш ёсдюргендиле. Ала да, ата-аналарына ушап, адепли намыслы адамла болгъандыла.
Бюгюн биз Мазихов Борис Беслановични жюрекден алгъышлай, анга узакъ ёмюр тилейбиз. Саулугъу бла туугъан-туудугъундан къууана, кёп жашасын.