Жыйырма беш жылны энчи сакъланнган табийгъат жерлени къоруулай

Быйыл "Марш парков - 2020" атлы  халкъла аралы акция  «Жыйырма беш жылны энчи сакъланнган табийгъат  жерлени къоруулай» деген чакъырым бла бардырылады. Аны магъанасы энчи къорууланнган табийгъат тийрелени (ООПТ) проблемаларына власть органланы, СМИ-ни, бизнесни эмда жамауатны эслерин бурургъады. Быйыл ол РФ-ни Президентни грантла фондуну болушлугъуна тийишли болгъанын да белгилерчады.    

Бюгюнлюкде Россейде къырал эм регион магъаналы  12 минг чакълы заповедник, миллет эм табийгъат парк  барды. Ол а саулайда  жерлени 13 процентиди.  Аны хайырындан алыкъын  битимлени бла жаныуарланы 70 процентин сакъларгъа  онг барды.  

«Марш парков»  къыралда экологияны сакълау жаны бла эм уллу акцияладан бирине саналады. Жыйырма бла беш жылны ичинде анга алты миллионнга жууукъ адам къатышханды. Ол санда  12 мингден аслам  тюрлю-тюрлю иш этилгенди. Быллай огъурлу башламчылыкъда болушургъа сюйгенле аз тюйюлдюле. Саулай айтханда,  спонсорла  энчи сакъланнган жерлеге бла  миллет парклагъа   180 миллион сом ётдюргендиле. Бусагъатда  Маршны Сыйлы китабында аллай тёрт минг чакълы адам жазылып барды.    Кийик табийгъатны къоруулау жаны бла арасы аланы жандауурлукъ этгенлерине шагъатлыкъ къагъытла бла    саугъалагъанды.  

Табийгъатны къоруулауда правода жетишимли хайырланады.  Сёз ючюн  «Энчи сакъланнган табийгъат жерле», «Жаныуарланы юсюнден» законла  эм  Суу кодекс да практикада къыйматлылыкъларын билдиргендиле.   

Къабарты-Малкъарны Бийик - тау заповедниги «Марш парковну» бардырыу бла байламлы школчуланы, садикге жюрюгенлени эм билим бериу араланы келечилерин  эмда башхаланы  «Заповедная симфония» деген республикалы фестивальгъа  къатышыргъа чакъырады. Аны магъанасы  жаш адамланы экология культураларын ёсдюрюрге, бу жаны бла билимлерин байыкъландырыргъа эм  патриот сезимлерин кючлергеди.

Анга хакъсыз къатышыргъа жарайды. Ол биринчи мартдан башлап апрельни ахырына дери ишлерикди.  Кеси да бу номинациялада ётдюрюледи: «Энчи сакъланнган жерни дуниясы», «Волонтёр иш», «Экология-жарыкъландырыу, тинтиу иш», «Экинчи кере жарашдырылгъан сырьёдан этилген кийимле», «Табийгъатны къоруулау» эм  «Уллу Хорлам – жаш адамланы кёзлери бла».

Ахырында фестивальгъа къатышханланы барысына да шагъатлыкъ къагъытла берилликдиле.  Конкурсда хорлагъанла уа   дипломла бла эсде къалырча  саугъалагъа тийишли  буруллукъдула. Кесин эм айырмалы кёргюзтген а Гран-приге тийишли боллукъду. Бир тюрлю соруу болгъан бу телефон номерге сёлешсин: 89287208989.