Энчи-фермер мюлклени аякъландырыу - эллени айнытыуну себеби

Кёп болмай Москвада Россейни  энчи-фермер мюлклерини эм эл  мюлк кооперативлерини ассоциациясыны (АККОР)  XXXI Съезди ётгенди.  Анга регионлада Эл мюлк министерстволаны, агропромышленный комплекс жаны бла департаментлени, Россельхозбанкны, Росагролизингни, илму аралы  келечилери, тыш къыраллы партнёрла,  800 аслам фермер мюлклени, кооперативлени  таматалары эм башхала къатышхандыла. Къабарты-Малкъарны атындан  жыйылыуда эл мюлк министрни орунбасары Чеченланы Ислам болгъанды.     
 

Съездни ача,  РФ-ни Эл мюлк министри  Дмитрий Патрушев  агропромышленный комплексни айнытыуда   фермер мюлклени магъаналыкъларыны, алагъа къыралны жанындан къалай болушлукъ этилгенини  эмда эл жерлени айнытыуну   юсюнден хапарлагъанды. Ызы бла ол Правительствону Председатели  Михаил Мишустинни  письмосун  да окъугъанды. Анда гитче мюлклени айнытыу къыралны политикасында къыйматлы бёлюмледен   бири  болгъаны,   ол себепден фермерчилик айнырча  Правительство  уллу эс бургъаны да айтылгъанды.   Дагъыда сёлешгенлени къауумунда  министрни орунбасарлары   Джамбулат Хатуов,  Оксана Лут, Елена Фастова, АККОР-ни президенти  Владимир Плотников,  Россельхозбанкны таматасыны орунбасары  Ирина Жачкина да болгъандыла.   

Жыйылыуда былтыргъы жылны  эсеплери да чыгъарылгъандыла. Ол санда  фермер мюлкле келтирген файданы ёлчеми   12 процентден  13,6 процентге  ёсгени неда бёлюмде хайырны 110 процентге дери жетгени  белгиленнгенди. Гитче бизнес битимчиликде да баш жерни алгъаны, былтыр орулгъан мирзеуню ючден бири гитче мюлклеге жетгени да сагъынылгъанды.  Малчылыкъ да бюгюнлюкде  предпринимательлени хайыры бла айный баргъаны чертилгенди.  

- Фермерчилик бла кооператив биригиулени эм  агробизнесни айнытыугъа   къыралны жанындан аслам эс бурулады, ол себепден Эл мюлк министерство мындан арысында да алагъа  болушлукъ бериуню механизмлерин игилендиргенлей барлыкъды. Сёз ючюн   «Фермерлеге болушлукъну системасын къурау эм эл кооперацияны айнытыу» программа бла   адрес болушлукъ халда 19 миллиард сомгъа жууукъ берилгенди.  Андан сора да,  «бир» субсидия бла льгота кредитни  да 10,8 миллиард сом чакълысы хайырланылгъанды, деп къошханды  Дмитрий Николаевич. 

Быйыл Россейни Эл мюлк министерствосу грантла бериуню механизмин да тынч этгенди, ахчагъа да къошханды эм аны хайырланыргъа жарагъан жумушланы тизмесин  кёбейтгенди. Аны бла бирге энди  гитче  мюлкле битимчилик жаны бла проектлерин жашауда бардырыргъа  онг табарыкъдыла.    
 Программаланы баш борчларындан бири  - элледе жашагъанланы жашауларын игилендириргеди,  «Эл жерлени комплекс халда айнытыуду».   Аны чеклеринде эл мюлкде къармашханла тийишли  жашау журт бла жалчытылыныргъа,  иш къоллу болургъа онг табарыкъдыла эм  инфраструктура да  айнырыкъды.