Фронтчуланы юслеринден не къадар кёп шартла жыяр муратлыдыла

Къабарты-Малкъарны аскер комиссариаты билдиргенича, РФ-ни Къоруулау министерствосу  фронтчуланы юслеринден не къадар кёп шартла жыяр муратда «Дорога памяти» деген проектни башлагъанды.  Ол хар инсанны да тарых магъаналы тинтиу иши боллукъду. Битеу шартла Москвада IT-лабораторияда жыйышдырыллыкъдыла.

Алайды да, кёп да бармай фронтчуланы, къоруулау предприятиялада уруннганланы, партизанланы, блокадалы Ленинградда жашагъанланы, маданиятха къуллукъ этгенлени, аскер корреспондентлени миллионла бла суратлары бир жерде бирикдирилликдиле. Москваны тийресинде Россейни Сауутланнган кючлерини баш храмыны къатында Хорламны 75-жыллыгъыны намысына деменгили галерея ишленеди. Ары Сауутланнган кючлени Ара музейинде  шёндюге дери жашырынлыкъда сакъланнган экспонатла бла суратла да салынырыкъдыла.

Кеслеригизни  урушха къатышхан жууукъларыгъызны юсюнден билдириулени (суратланы бла хапарланы) кеси аллыгъызгъа проектни бу сайтларына жибераллыкъсыз: foto.pamyat-naroda.ru  эмда http://DOROGA.MIL.RU.  Алай интернетни хайырланыр амал жокъ эсе, Къабарты-Малкъар Республиканы аскер комиссариатыны ачыкъ пунктларына эмда жашагъан жеригизде район аскер комиссариатха келип, ол жумушугъузну тындыраллыкъсыз. Битеу шартла жангыдан тинтилликдиле, суратла бла документле уа жарашдырылгъандан сора иелерине къайтарыллыкъдыла.

9 майгъа дери жиберилген неда келтирилген  суратла «Патриот» паркда Сауутланнган кючлени баш храмыны тийресинде узунлугъу 1418 атлам болгъан (уруш аллай бир кюнню бла кечени баргъанды) мемориал комплексге къошуллукъдула. Алай фронтчуланы юслеринден билдириулени жыйыу андан ары бардырыллыкъды. «Дорога памяти» проект заман бла чекленирик тюйюлдю, нек дегенде уруш этгенлени барысын да табаргъа керекди.