Бийик-тау музейни айбатландырадыла

Элбрус тийресинде къорууланыуну музейин айбатландарыу ишле Уллу Хорламны 75-жыллыгъына жораланнган байрамгъа дери бошаллыкъдыла, деп билдиргенди маданият министрни къуллугъун толтургъан Мухадин Кумахов 2019 жылны эсеплерин чыгъаргъан ведомствону коллегиясыны тюбешиуюнде.

Эсигизге салайыкъ, Элбрус тийресинде къорууланыуну музейи дунияда эм бийикде орналгъан музейге саналады. Ол 1971 жылда ачылгъанды эм 3,5 минг метр бийикликдеди. Бу тийре Уллу Ата журт урушну жылларында къанлы сермешлени майданы болгъанды. Архивледе сакъланнган къагъытлагъа кёре, Элбрусну къоруулауда 366 адам жоюлгъанды. Музейни экспозициясы суратладан эмда 1942-43 жыллада Элбрусда сермешле баргъан жерледе табылгъан сауутладан къуралыпды.

Къараучула быллай экскурсиялагъа бараллыкъдыла: Кавказда сермешлени, тау ауушла ючюн къагъышыуну, совет аскерле бла тырныауузчула Бего тау ауушдан ётгенлерини сурат кёрмючлери эм аскер-альпинистлени юсюнден толу хапарлагъан тюбешиуле.