Ленинградны блокадниклерине – ыразылыкъ къагъыт

Къабарты-Малкъар къырал университет «Блокадалы гыржын» аты бла битеуроссей эсгериу акциягъа къошулгъанды. Анга жоралап, китапханада энчи кёрмюч къурагъандыла. Анга къараргъа бизни жерлешибиз, поэт, аслам жырланы автору эм жырчы Ефрем Амирамов да келгенди. Ол жаш телю аудиториягъа назмула окъугъанды эмда кёрмючню къурагъанлагъа жюрек ыразылыгъын билдиргенди. Артистни жашауу асламысында шимал ара шахарда ётгенди, аны себепли Санкт-Петербург бла байламлы маданият-асламлы жумушла аны жюрегине бютюн жууукъ болгъанын билдиргенди.

Китапханагъа келгенле блокаданы тарыхы бла танышхандыла. Экспозициягъа Илья Эренбургну, Алеся Адамовични, Василий Ардаматскийни, поэтесса Ольга Берггольцну эм башха авторланы китаплары салыннгандыла. Алада Совет Союзну адамларыны урушну, къуршоуну къыйын кюнлеринде жигитликлерин кёргюзтгенлерини  юсюнден ол заманны статьяларында, назмуларында, суратларында эм къагъытларында айтыладыла.

Стендлени биринде блокадалы гыржынны юсюнден толу айтылгъанды. Аны ун къытлыкъдан жаланда андан биширмегендиле. Аш-азыкъ промышленностьну специалистлерини алларында ётмекге къошуллукъ компонентле табаргъа борч салынып эди, аны ёлчемин кётюрюр ючюн. Аны себепли уннга хуржунладан жыйылгъан букъу, къышхыр эм башха затла да къошхандыла. Сёзсюз, аны татыуу бюгюндеча болмагъанды. Эсигизге салайыкъ, блокаданы заманында бир кюннге ишлеген адамгъа 250, ишлемегеннге 125-граммлыкъ туурамла бергендиле. Андан башха жукъ да угъай. Жыйылгъанлагъа аллай бирер туурам юлешгендиле.

Акцияны чеклеринде, ким сюйсе да, блокадникге ыразылыкъ къагъыт жазарча онг бергендиле. Ала битеу Ленинградны блокадниклерини биригиуюне ашырыллыкъдыла эмда ветеранлагъа юлешинилликдиле.

- Бюгюн мында сиз кёрген китапла бла къагъытла сизге, жаш тёлюге, деп салыннгандыла. Сиз бизни ата-бабаларыбызны жигитликлерин, ётгюрлюклерин билирча, аланы юслеринден окъурча, суратлау фильмлеге къарарча, ёхтемленирча ала бла, - дегенди жыйылыууну ахырында жаш тёлюге КъМКъУ-ну китапханасыны илму-техника информация бёлюмюню таматасы Мадина Буранова.