Атчыла

Гуртуланы Бертни жашы Оюсну «Келеметлары» деген китабында окъугъанма Келеметланы Наныуну юсюнден. Анда аны юсюнден сейир шартла туура этиледиле. Наныу уста ат чапдырыучу болгъанды. Чаришледе аны аллына бир киши да ётмегенди. Ол, аты къаты чабып бара тургъанлай, иер кереклени, бирем-бирем тешип, аланы жерге атып, артха, ызына айланнганда уа, энишге ийилип, аланы жыйып баргъанды. Аны къой, узалып жерден жумуртханы окъуна алгъанды. 

Аны сагъына келгеним бошдан тюйюлдю. Мен хапарын айтырыкъ Къулийланы Муссаны жашы Магомет да Наныуну къызындан туугъанды. «Алма терегинден кери кетмейди», деп халкъда бош айтыла болмаз. Магомет сюргюнде болгъан жыллада атын махтау бла айтдыргъанды, кёп жерлеге баргъанды, кёп затны кёргенди. Бир кере  анга, тургъан жеринден 100 километр узакълыкъгъа барып, чаришге къатышыргъа да тюшгенди.

Атлада чабышханыны юсюнден ол былай эсгергенди: «Къыргъызстанны Ош областыны ипподромуну къатында аскер аэродром болгъанды. Бир жол мен, биринчи келип, атдан тюшгенимде, лётчикле, терк окъуна тёгерегими алып, соруула берип башлайдыла. Мени атдан жыгъылмай, алай къаты чапханым алагъа бек сейир кёрюннгенди. «Жыгъылырма деп къоркъмаймыса?»-деп соргъанларында, «Сиз а кёкде окъуна учасыз да къоркъмай»,-дегенме.

Къулийланы Магомет 1948-1953 жыллада Ош областьны ипподромунда жоккей да, тренер да болуп ишлегенди. Ол кезиуню ичинде алчы жерлени 123 кере алгъанды. 1953 жылда анга «Экинчи категориялы тренер» деген ат аталгъанды.
     

  Туугъан журтуна къайтхандан сора Къулий улу Булунгуда жангы къуралгъан колхозда жылкъы фермагъа таматалыкъ этип бёлек заманны ишлегенди. Артда, мюлкде якланы жайгъанларында, аланы кютгенлеге 22 жыл таматалыкъ этгенди.