Аурууланы заманында тинтир онг барды

Кёп болмай Черек районну  администрациясыны башчысы Муртазланы Борис   онкология ауруулагъа профилактика къалай  бардырылгъаныны юсюнден кенгеш ётдюргенди.    Анга республиканы  онкология диспансерини баш врачы   Анатолий Канцалиев, медицина консультация диагностика араны врач-нейрохирургу Биттирланы Азрет да къатышхандыла.

Жыйылыуну ача, Муртазланы Борис аман аурууладан ауушханланы санын азайтырча диспансеризацияны тири  бардырыргъа, саусузлагъа уа  тийишли  медицина болушлукъ берилирге кереклисин чертгенди.  

Анатолий Канцалиев республикада  онкология ауруула бла болумну юсюнден айта, саусузланы санына жыл сайын къошула баргъанын белгилегенди. Ол айтханнга кёре, кёбюсюнде рак  ёпкелени бийлейди, ызы бла  ёшюнлери, чегилери, аш орунлары ауругъанла барадыла.  

- Адамланы кёбюсю заманында кеслерине къаратыр орунуна, врачха  амалсызлыкъларында  келедиле. Алай бирде аллай кезиуде  кеч болады.  Аны ючюн бир заты къыйнап къоймагъан,  халинде неда юсюнде тюрлениуле эслеген адам участокда врачха барыргъа  керекди. Ол къарагъандан сора башха специалистлеге ашырлыкъды, деп билдиргенди баш онколог. 

Биттирланы  Азрет да профилактиканы  уллу себеплиги болгъаны айта, аурууланы кёбюсю адамла ашны айыра билмегенлеринден, тютюн эм аракъы да  ичгенлеринден башланнганларын эсгертгенди.   
Тюбешиуню ахырында  эллени таматаларына   болумну игилендирирча  диспансеризацияны  ётдюрюуге  аслам эс бурурлары   буюрулгъанды.