Тренерлик ишинде баш магъананы сабийлени саулукъларын сакълаугъа береди

Къыркъ жылын спортха жоралагъан, эркин тутушуудан бла боксдан СССР-ни спортуну устасына кандидат Гузеланы Азрет бюгюнлюкде сабийлени боксха юйретеди. 

 

Азрет 1955 жылда 30 ноябрьде Киргизияда туугъанды, школну уа мында Огъары Жемталада бошагъанды. Аскерге барыр заманы жетгенлей, аны Совет Союзну Германияда аскер-хауа кючлеринде къуллукъ этерге иедиле, анда эки жылны жашырын связист болуп турады. Бери къайтханлай, Къабарты-Малкъар къырал университетде филология жаны бла билим алып, элинде устаз болады, колхозда, заводда да ишлейди. 1982 жылда уа фахмулу жашны ДОСААФ-ха аладыла, анда ол инструкторну къуллугъун толтурады. 1985 жылгъа дери КБАССР-ни Финансла министерствосуну бёлюмюне башчылыкъ этеди. Андан бери жашауу толусунлай да спорт бла байламлыды. 

 

Алгъа ол «Спартак» спорт обществону областной советини тамата инструктору, ызы бла Чегем районда советини таматасы болады. 2007 жылда уа аны боксдан спорт школну завучу этедиле эмда КъМР-де любитель боксдан федерацияны биринчи жууаплы секретарына айырадыла. Ол кеси да сабийлеге боксдан бла тутушуудан жарау этдирип тебирейди.    

 

Азрет жаш заманында волейбол, баскетбол, футбол, стол теннис, тутушууну эркин эм грек-рим тюрлюлери, самбо, женгил атлетика эм башхала бла кюрешгенди, аланы барысындан да разрядлары барды. Аскерде окъуна эришиулеге къатышмай къалмагъанды, андан алгъан грамоталары бюгюннге дери сакъланнгандыла. Бу жетишимлеринден сора да, сайлагъан ишине кертичилиги, спортну айнытыугъа салгъан къыйыны ючюн ол Спорт министерствону, «Спартак» обществону Россейде ара советини, профсоюзланы эмда башха учрежденияланы сыйлы грамоталары бла саугъаланнганды. 

 

Тренерлик ишинде ол баш магъананы сабийлени саулукъларын сакълаугъа эм кючлеуге береди. «Манга, бек биринчи, аланы саулукълары, окъуулары керекди, спорт а артдады. Бир-бир тренерле жетишимле болдурур ючюн, аланы кюннге эки кере окъуна жарау этдиредиле. Аны тюзге санаялмайма. Марданы билмеу хатагъа келтирмей къоймайды. Манга он чемпионну хазырлагъандан эсе, 100-200 саулукълу сабийни ёсдюрген магъаналыды. Кёп балалы юйюрден болгъаным себепли гитчелени бек сюеме, аны ючюн муратым усталыгъымы, билимими, сынамымы да алагъа ётдюрюргеди», - дегенди Азрет бизни бла ушагъында. 

 

Кертиси бла да, Азретни атасы Махмут бла анасы Лиза ол къыйын заманлада он сабийни ёсдюргендиле, адет-намысха, тёзюмлюкге юйретгендиле, халкъларына, жерлерине сюймекликни сингдиргендиле. Азретни бла аны юй бийчеси Черкеслены Зухураны да эки къызы бардыла – Зурият бла Аминат. Зурият экономика жаны бла бийик билим алгъанды, Аминат а алыкъа студентди. Ала экиси да, аталарыны ызы бла бара, спорт бла кюрешедиле, дзюдодан бла самбодан спортну устасына кандидатладыла.