Хайырындан эсе хатасы уллу болуп къалмасын

Сууукъла башланнганлары бла водительлеге да  дагъыда бир ауара къошулады -  чархланы алышындырыу бла бирге мияланы жууучу сууну да сайлауну къайгъысын этерге тюшеди. Ол бузлап къалмаз ючюн анга кёп химия затла къошуп  жарашдырадыла. Алай ала водительни саулугъуна хата салыргъа боллугъун а тергеймидиле? Бу соруугъа Роспотребнадзорну Къабарты-Малкъарда управлениясыны специалистлери жууап бередиле.

Быллай сууланы асламысын спирт, бояу, жууучу эмда ариу ийис бериучю затла къошуп жарашдырадыла. Биринчиси, асламысында,  изопропил спиртди, бек эриши, ачы ийис этеди, ацетоннга ушаш.

Ол адамгъа заранлы тюйюлдю. Алай аны ичерге уа арталлыда жарамайды. Быллай продукцияда аны юсюне пропиленгликоль неда этиленгликоль да къошуучудула.

Бирле уа быллай продукцияны метил спирт къошуп жарашдырадыла. Ол а законсуз ишди. Нек дегенде метанол мияланы бузламазына себеплик этгенликге, бек къоркъуулу уугъа саналады. Аны жаланда бир чай къашыгъы адамны сокъур этерге боллукъду. Ол нервалагъа, ёпкелеге да  хата  салады. Андан къаннга жаланда жюз миллилитр, бир-бирледе уа андан да аз тюшгени уа  адамны жашаууна окъуна къоркъуулуду. Аны бла ууланыу, биринчиден, аз-маз эсиртгенча алай белгили болады. Ызы бла адамны кёлю аман этеди, башы ауруп башлайды, кёзлери  амандан аман кёрюп тебирейдиле. Артда уа  териси кёксюлдюм болуп, солууу да тыйылып башлайды. Ууланыу теренине кетсе уа,  адам тунчугъуп ёледи.

Россей Федерацияда метанолну автотранспортха керекли затлада хайырланыугъа, ол къошулуп жарашдырылгъан затланы адамлагъа сатыугъа баш санитар врачны 2007 жылда 47-чи номерли буйругъу бла чек салыныпды, ол эсигизде болсун.

Мияла жууучуну уа жаланда белгили жерледе (тюкенледе) сатып алыргъа кюрешигиз, кимден болса да угъай. Дагъыда шешаны юсюндеги къагъытда не зат жазылгъанына эс буругъуз: ол къайда чыгъарылгъанына, предприятияны атына, тургъан жерине, продукцияны къурамына, ол къаллай мардалагъа  келишгенине, хайырланыргъа жараулу болжалына эмда къоркъуусузлукъ жаны бла излемлерине. Быллай продукцияны жол жанларында (законсуз халда) сатылгъанын  неда шешалада  сагъынылгъан шартланы толусунлай басмаланмагъанларын эслесегиз, аны юсюнден Роспотребнадзоргъа билдиригиз.