Заманында тёленмеген тазир эки кереге кёбейтиледи

Ыйыкъны ичинде, 19-25 октябрьде, административ бузукълукъланы эсепге алгъан автоматизацияланнган системаны шартларына кёре, жолда жюрюуню жорукъларын сакъламагъанлагъа 7,6 мингнге жууукъ терслеу материал хазырланнганды. Тазирни ёлчеми 5 миллионнга жетгенди.  

Эсигизге салайыкъ, аны 60 кюнню ичинде тёлерге тийишлиди, болжал сакъланмаса, терслеу бегимле сюд приставлагъа бериледиле. РФ-ни Административ бузукълукъланы кодексини 20.25 статьясына кёре, борч заманында кетерилмесе, аны ёлчеми эки кереге кёбейтиледи неда инсан 50 сагъатны борчлу халда хакъсыз ишлеге тартылады. 

Борч он минг сомдан кёп болса, транспортну жюрютюрге эркинлик сыйырылгъанын эсгертирчады. Болсада федерал законлагъа этилген тюзетиулеге тийишлиликде, тазир чыгъарылгъандан 20 кюнню ичинде тёленсе, аны ёлчемини жартысын берирге эркин этилгенди. 

Сизге административ тазир салыннганыны  бла къалгъаныны юсюнден РФ-ни Къыралавтоиспекциясыны сайтында (www.gibdd.ru),   инспекцияны бёлюмлеринде билирге онг барды. Дагъыда бу шартланы къырал жумушланы порталында эсепге туруп, къырал эм муниципал жумушла толтурулгъан кёп функциялы аралада (МФЦ) алыргъа онг барды.