Геодезистни бла картографны кюню

Хар жыл сайын мартны экинчи ыйых кюнюнде Россейде Геодезистлени эмда картографланы кюню белгиленеди. Бу байрам РФ-ни Президентини буйругъу бла 2000 жылда 11 ноябрьде тохташдырылгъанды.

Карталаны жарашдырыу бла бизни къыралда ортанчы ёмюрледе кюрешип башлагъандыла. Сёз ючюн, Москваны жерлерини картасы 1525 жылда чыкъгъанды. 1667 жылда уа аскер башчы П.И. Годуновну буйругъу бла Сибирьни тийресини картасы жарашдырылады. Аны копиясы бюгюнлюкде да Стокгольм шахарны къырал архивинде сакъланады.

Картограф усталыкг а андан кечирек чыкъгъанды – 1720 жылда Пётр I буйругъу бла аллай ишле башланнгандан сора. Артда 1734 жылда Россей Империяны биринчи картасы этилгенди.

Биринчи Николай патчахны кезиуюнде, Пулково обсерватория къуралгъаны бла, геодезия бла картография бек белгили атламла этип башлайдыла. Ол жыллада кёп губернияланы топография карталары жарашдырылгъан эдиле. Александр II патчахны заманында ол карталаны сатып алыргъа онг чыгъады. Кавказны, Орта Азияны карталары да аны кезиуюнде жарашдырыладыла.

Геодезия эмда картография ишлени бир тюрсге келтирип бардырыр умутда 1919 жылда 15 мартда РСФСР-ни Совнаркомуну буйругъу бла Бийик Геодезия Управление (ВГУ) къуралады. Артда ол кеси, аллай жумушла бла кюрешген ведомствола да бир ненча кере тюрленнгендиле. 1992 жылда уа Россейни геодезия эм картография службасы ишлеп башлайды. Бюгюнлюкде ол Росреестрге киреди. Аны хар регионда да бёлюмю барды.

Геодезистлени бла картографланы ишлери бек магъаналыды. Шахар къурулуш проектле, уллу инфраструктура башламчылыкълагъа керек маршрутла аласыз боллукъ тюйюлдюле.