Социал проектлени эм игилерин ачыкълар умут бла

Къабарты-Малкъарда социал предпринимательство сферада «Жылны эм иги социал проекти» деген бешинчи Битеуроссей конкурсну регион кезиую бардырылып  башланнганды. Эришиуню РФ-ни Экономиканы айнытыу министерствосуну эмда Стратегиялы башламчылыкъланы агентствосуну (АСИ) болушлугъу бла Россейни къырал социал университети къурагъанды, деп билдиргендиле КъМР-ни Экономиканы айнытыу министерствосундан.

Конкурс социал бёлюмде предпринимательство бла кюрешгенлени, кеси да адамланы жашауларын игилендирирге, иш бла жалчытыугъа себеплик этерге, сакъатлагъа, абаданлагъа, къыйын жашау болумлагъа тюшген гражданлагъа билеклик этерге деп жарашдырылгъан эм иги проектлерин ачыкълар умутда бардырылады. Ала быллай бёлюмледе жарашдырылыргъа боллукъдула: саулукъ сакълау, билим бериу, культура, цифралы экономика, экология, урунуу.

Эришиулеге къатышыргъа коммерциялы организацияла эмда энчи предпринимательле чакъырыладыла. Ала кеслерини жетишимлери, проектлерин тамамлагъанда сынамлары бла бирсилени шагъырейлендирирге, болушлукъ, клиентле эмда партнёрла табаргъа да боллукъдула.

Жер-жерли кезиуде хорлагъанланы башха регионланы келечилери бла эриширге амаллары боллукъду. Дагъыда лауреатлагъа, акселерация программалагъа къатышып, проектлерин тамамлаугъа финансла табаргъа онг берилликди.
Алай бла конкурсха къатышыргъа сюйгенле аны интернет-сайтында (http://konkurs.rgsu.net), КъМР-де социал сферада инновацияланы арасында неда ТРИZ арада 30 сентябрьге дери регистрацияны ётерге керекдиле. Соруулары болгъанла +7 (963) 391-77-87 телефон номер бла сёлешсинле неда triz.center07@gmail.com электрон почтагъа жазсынла.