Юлгюлю юйюр

Къашхатаучула Локьяланы Тахирни бла Ариужанны юйюрлери озгъан жыл «Жылны юйюрю-2023» деген Битеуроссей конкурсда Черек районну «Алтын юйюр» деген номинациясында регион даражада кёргюзтгенди. Ала 41 жыл мындан артха къадарларын бир этгенден сора, юйюрлеринде юч сабий тууады. Бюгюнлюкде ала 7 туудукъну аппасы бла аммасыдыла. 

Тахир Владимирович 80-чи жыллада Роспотребсоюзну техникумун бошайды. Алай ол усталыкъ бла бармай, кесин аскер къуллукъгъа толусунлай береди. Кёп жылланы ол 27839 аскер частьда къуллукъ этип тургъанды. Аскер эм жамауат ишде бет жарыкълы урунуп турагъан Локья улу СССР-ни, ызы бла уа Россейни да сыйлы майдаллары бла саугъалана келгенди. Сёз ючюн, 1999 жылда ол «За отличие в военной службе» деген майдал бла белгиленнгенди. Бюгюн да ол аскер бёлюмде тамата прапорщик болуп къуллукъ этеди.

Юйюрню анасы Ариужан Мустафаевна да баш иеси бла бирге «техник-технолог» деген усталыкъны алгъан эди. Тутхан ишин бийик даражада толтургъаны ючюн, ол халкъны излемлерин жалчытхан сферада социалист эришиуде хорлагъанлыгъына Сыйлы грамота бла белгиленнген эди. 

Заман, жашау да тюрлене баргъанлары бла бирге, ол да жангы усталыкъ алыргъа таукел болуп, «Педагогну ишинде интернет технологияла» деген ыз бла эм «Шёндюгю болумлада школ библиотекаланы ишлерин бардырыу» деген усталыкъ ызла бла КъМКъУ-ну педагогланы билимлерин ёсдюрген институтуну шагъатлыкъ къагъытларына тийишли болгъанды. 

Андан сора таулу ана кёп жылланы Къашхатауну «Нюр» деген сабий садында юйретиучю болуп ишлеп кетгенди. Бюгюн да аны кёп ата-ана энчи ыразылыкъ эм сюймеклик бла эсгередиле.

Шёндю ол пенсиядады. Юй жумушлагъа къарай, туудукъларын ёсдюреди. Локьяланы юйюрде къачан да сабийни юйретиуге аслам эс бёлюннгенди. Кеслериникиле школда окъугъан кезиуде Тахир бла Ариужан аланы ариу къылыкълылыкълары, иги окъуулары ючюн кёп кере ыспас къагъытланы терк-терк ала тургъандыла. Билим алыугъа юйюрде не заманда да энчи магъана берилгенди. Школдан сора аланы юч сабийлери да бийик билимле алып, хар бири да бирен жерде бет жарыкълы ишлейдиле. Ата-аналарындан юйреннген затларын ала сабийлерини юслеринде кеслери да хайырланадыла. 

Къызлары Алина 2007 жылда КъМКъУ-ну бошагъанды. Ол «Социал иш» усталыкъны алгъанды. 2012 жылда ол дагъыда «Юриспруденция» ызны бакалавры болгъанды. Бир къауум жылдан Алина Тахировна социал учрежденияны ишин бийик даражада къурап бардырыу семинарлагъа къатышып, Сертификатла алгъанды. Бюгюнлюкде ол Черек районну «Халкъны социал жалчытыу жаны бла комплексли арасыны» директору болуп ишлейди. Эки сабий ёсдюреди.

Экинчи къызлары Талифа уа экономистди. Орта школну, КъМКъУ-ну да айырмалы бошап, эгечи Алина башчылыкъ этген Арада урунуу эркинликлени къоруулау жаны бла специалист болуп ишлейди. Ол да юйдегилиди, юч сабийни анасыды.

Тахирни бла Ариужанны жашлары Алим инженер-экологду. КъМКъУ-ну «Охрана окружающей среды и рациональное использование природных ресурсов» деген специальность бла бошагъанды. Бир къауум жылдан ол да Ставрополь шахарда Социал сферада ишлегенлени усталыкъларын ёсдюрюу эм жангы усталыкъла бериу арасыны программасын ётгенден сора социал ишчини дипломун алып, бюгюнлюкде эгечлери бла бирге Черек районну «Халкъны социал жалчытыу жаны бла комплексли арасында» ишлейди. Миллетибизде жюрюгенича, юйюрю бла атасы-анасы бла жашайды.

Тахир бла Ариужаннга туудукълары неден да татлыдыла. Алагъа къарай, тамата тёлю жашаргъа итинеди, ахшы муратлыды.