«Къадар мени таулу халкъ бла танышдыргъанына бек ыразыма»

Талай жыл мындан алгъа  Элбрусну тийресиндеги «Чегет» къонакъ юйде бир ненча кюнню ичинде «Алтын майдан» деген фольклор фестиваль бардырылгъанды. Аны ишине белгили болгарлы жырчы Бисер Киров  да къатышханды, жюриге председательлик да этип. Мен ол заманда аны бла тюбешип, мында болгъан кезиуюню юсюнден оюмун айтырын тилеген эдим. Ол кеси да сентябрь айда туугъан эди да, бу кюз артыны ал кюнлеринде аны бла жылы ушагъыбызны эсгерирге излегенме.

-Бисер Христович,  бизни республикагъа бу жолгъа дери келгенми эдигиз?

-Жарсыугъа, бир кере да угъай. Минги тауну юсюнден а  кёп хапар эшитгенме, аны ариулугъун суратда кёргенме. Мында болгъан кюнлерим Элбрусну этегинде озгъанларына чексиз къууанама.

-Чегетге, Азаугъа да канат жолла бла чыкъгъан болурсуз?

-Бери келген биринчи кюнде  окъуна. Мен аллай тамашалыкъны кёрмегенме бу жолгъа дери. Ариу хауа, таула, къар тёппеле... Айтып ангылатыргъа сёз тапхан къыйынды.

-Сиз мында жангы шуёхла да тапхан болурсуз кесигизге?

-Сёзсюз, Курданланы Узейир, малкъар халкъны айтхылыкъ адамы, балетмейстер Къудайланы Мухтар да. Аны юсюнден мен эртте да эшитген эдим, алай бу кюнледе аны бла жууукъ танышханыма ыразыма. Ол аллай тамаша адам болгъанын мен билмей эдим.

Аладан  сора да, Михаил Калинкин, Геннадий Макаров, аланы да фольклордан ангылаулары бек  уллуду. Ала искусствогъа берилген адамладыла. Къысха айтханда, байрам муратына жеталгъанды. Болмагъанча уллу иш тамамланнганды. Кёплени эсинде ол Евразияны халкъла аралы байрамыча къаллыкъды.

-Сиз мында тургъан кезиуде мастер-классла да бергенсиз.

-Хау, ол эгечле Гамира Гадельшина бла Замира Рысаева  фестивальны  къураргъа мурат этгенлеринде эсге алыннган юйретиу программагъа киргенди. Фестиваль баргъан жети кюнню ичинде кёргюзтюлген музыкалы номерле эм мен берген концерт да анга къуллукъ этгендиле.

-Сёзсюз, мында  болгъан кюнледе сиз бу жерлиле бла да танышхан болурсуз?

-Танышхан бла да къалмай, мындан ары шуёхлукъ жюрютюрге да келишгенбиз. Мында, бу аламат тауланы араларында, сейирлик адамла  жашайдыла.  Къадар мени таулу халкъ бла танышдыргъанына бек ыразыма. Биз къарындашлабыз. Бизни тамырларыбыз бирди. Ата-бабаларыбыз да алай. Малкъар халкъны къыраллыгъы къайтарылгъан кюнню байрамына тюшгениме да жюрегим бла къууанама. Сиз кёчгюнчюлюкде кёрген къыйынлыкъланы да юслеринден кёп эшитгенме. Мындан ары аллай зарауатлыкъны бир заманда да сынамагъыз. 

-Сизни мында миллет ашарыкъла бла да сыйлагъан болурла?

-Бек татыулу азыкъла бла. Жумушакъ, къаты да бишлакъны, хычинлени, айранны бек жаратханма. Ауур акъыллы, оюмлу, чынтты эр кишилеригиз бардыла. Къонакъбайлыкъ эте билгенлерини юсюнден а айтмай окъуна къояйыкъ.

Мен сизни  бу  ариу Минги тауугъузну тийресинден кетип барама, жюрегими къыйыры уа мында къалгъанды. Бир кесек мудахма кетерге тюшгени ючюн.  Мында  мени  къарындашларым, ариу эгечлерим къаладыла.

-Болгариягъа  барсагъыз, бизни халкъны юсюнден да хапар айтырыкъ болурсуз?

-Бек  кёп. Нек дегенде кёп затны билгенме, кёргенме . Сау болугъуз, мен сизни миллетигизни аллында баш урама.
Бисер Киров башында къалпагъын бир заманда да тешмейди. Алай ол кюн ол, аны къолуна алып, энишге ийилгенди. Белгили жырчыны малкъар  халкъгъа этген намысы эди ол.