Электропечьлени хайырланнганда хата чыкъмазча

Къышда отоуланы жылытыр ючюн, кёпле электропечьлени хайырланадыла. Алай аланы токга салгъанда талай жорукъну билирге тийишлиди, нек дегенде ансыз къыйын болум чыгъаргъа боллукъду. Аны бла байламлы Россейни МЧС-ини Къабарты-Малкъарда Баш управлениясы эсгертиуле этеди.

Бек биринчи, аланы жангыз да заводлада ишленнгенлерин алыгъыз, электроприборну къараусуз бир заманда да къоймагъыз, сабийлеге аланы жандырыргъа – ёчюлтюрге эркин этмегиз. Электропечьлени терк къабыннган затланы къатларында салмагъыз (мебель, терезе жабыула эм аллай башха). Приборланы букъудан тазалай туругъуз, алада суу быстырланы къургъакъсытмагъыз, приборну вилкасы неда розетка исси болмасынла, ол печьни бузукълугъу болгъаныны неда сетьге асыры уллу ауурлукъ баргъаныны биринчи белгисиди, бир розеткагъа экиден кёп электроприборну къошмагъыз. Ол электропроводканы аварийный халда ишлетирикди, ток баргъан ызланы къыздырлыкъды, андан а от тюшерге да узакъ тюйюлдю. Юйден талай минутха окъуна чыгъа эсегиз да, электроприборланы барысын да розеткадан чыгъара туругъуз.

Эсигизде болсун: кёп электроэнергия къоратхан приборланы хайырланырдан алгъа эски проводканы алышыргъа тийишлиди. Бузукълукълары болгъан, адамла кеслери аллына жарашдыргъан эм къалгъан электроприборла от тюшюуню сылтаулары аслам боладыла. Сора, сабийлени электропечьле эм башха приборла ишлеген жерледе кеслерин къоймагъыз.