Бир къауум предприятияла ыйыкъгъа тёрт кюн ишлерикдиле

Алгъаракъда РФ-ни премьер-министри Дмитрий Медведев къыралда тёрт кюнлю ишчи ыйыкъны кийирирге кереклисини юсюнден айтханды. Бюгюнлюкде аны юсюнден кёп тюрлю даулашла бардыла.

Жууукъ кезиуде аны эксперимент халда Тюмен, Свердловск, Челябинск областьлада бла Пермский крайда бир ненча эл мюлк, илму, техника эм къурулуш предприятиялада кийирир мурат барды. Аны юсюнден РФ-ни Урунуу эм социальный къоруулау министерствосунда кенгешни ётдюрюрге хазырланадыла.

Россейни экономиканы айнытыу жаны бла министрини орунбасары Пётр Засельскийни оюмуна кёре, бир къауум предприятиялада адамла ишчи заманларыны 30-40 процентин бошуна ётдюредиле.

- Бизни борчубуз ишчи кюнню къысхартыу угъай, аны хайырлы ётдюрюуню амалларын сингдириудю, - дегенди орунбасар.

Болсада кёпле биринчи кюнден бери да айтадыла быллай оноуну хайырлыгъы болмазлыгъын. «Халкъла аралы финансла араны» эксперти Дмитрий Иногородский чертгеннге кёре, ишчи ыйыкъны жаланда производстволу кёрюмдюле бийик болсала къысхартыргъа керекди.

- Жарсыугъа, бизде бюгюнлюкде алай жетишимли ишлеген мюлкле жокъдула. Дагъыда адамла юч кюнню ичинде башларына бош болгъандан не хайыр? Ишчи хакъла къыралда алай бийикле тюйюлдюле хар ыйыкъдан адамла тюрлю-тюрлю аралагъа жюрюп солурча, - дейди эксперт.

Андан сора да, тыш къыраллы компанияланы асламы беш кюнню ишлейдиле. Сора бизни предприятияланы таматаларына да кеслерини ишчилерини солуу кюн чыгъып ишлеген кюнлери ючюн энчи тёлерге тюшерикди. Ол да керексиз къоранчла бла байламлы болуп кетеди.

Аны сылтауу бла иш хакъланы да азайтсала уа, халкъ тёзмезлиги туурады. Андан керексиз къаугъа чыгъаргъа боллукъду.