Болжалларына энтта да бир жыл къошулгъанды

КъМР-ни Промышленность, энергетика эм сатыу-алыу министерствосундан билдиргенлерине кёре, бюгюнлюкде регионда чагъыр продукцияны (219 жерде) сатыу бла кюрешген 136 организация барды. Алагъа аллай эркинлик берген 202 лицензия жарашдырылгъанды. Энтта да сегиз лицензия уа къара эмда тюрсюнлю темирледен къалгъан-къулгъанланы жыйыу, жарашдырыу эмда сатыу бла кюрешгенлеге берилгенди.

РФ-ни Правительствосуну 2022 жылда 12 мартда 353 номерли бегимине тийишлиликде, чагъыр продукцияны сатыу бла кюрешген 17 организацияны аллай къагъытларыны болжалын хакъ тёлетмей бир жылгъа созгъандыла. Ол алагъа бир миллион сом багъасына себеплик болгъанды.

Быллай сатыуда жалгъан продукция чыкъмазча министерство тинтиуле бардыра туруучуду. Былтыр аны бла кюрешгенлени 85 процентин жокъларгъа тюшгенди, аны хайырындан бузукълукъланы саны иги да азайгъанды.