Алгъыш сёзле айтылгъандыла, саугъала берилгендиле

Россейни Басмасыны кюнюнде республикалы эм район газетлени келечилерине Къырал концерт залда байрам къуралгъанды. Ишлеринде жетишимле болдургъан коллегаларыбыз тюрлю-тюрлю министерстволаны, ведомстволаны, жамауат организацияланы саугъаларына тийишли болгъандыла. Белгиленнгенлени арасында «Заманны» журналистлери да бардыла.

Жыйылгъанланы байрам бла КъМР-ни Правительствосуну башчысыны орунбасары Марат Хубиев алгъышлагъанды эмда КъМР-ни Башчысыны Россейни Басма кюню бла байламлы алгъышлауун окъугъанды. Анда журналистле жамауатны бла властьны арасында байламлыкъланы жалчытханлары, халкъны ол неда бу соруу бла байламлы оюмун къурагъанлары   айтылгъанды.

- КъМР-ни асламлы информация органларыны ишчилери республиканы жашаууну юсюнден билдириулени терк, тюзлюк бла, не жанындан да сюзюп бергенлери бла энчидиле. Шёндю Россейге къажау информация уруш бардырылгъан кезиуде, журналист этикагъа кертичи бола, республиканы халкъларыны тёрели хазнасын сакъларгъа, инсанлыкъ ниетлени къураргъа, аны бла бирге уа экономикада, социал сферада болгъан жумушланы кертилик бла ачыкъларгъа тийишлиди. Бек магъаналысы уа жигер, жигит адамларыбызны атларын ачыкъ этерге керекди,-деп айтылгъанды регионну оноучусуну алгъышлауунда. 

Марат Хубиев къууанчлы ишни да толтургъанды. Ол «Заманны»  басмагъа чыгъарыугъа жууаплы редактору Кетенчиланы Зульфиягъа, «Кабардино-Балкарская правда» эм «Адыгэ псалъэ» газетлени редакторлары Марьяна Белгороковагъа бла Марита Жилясовагъа КъМР-ни Правительствосуну Сыйлы грамотасын бергенди. 

 КъМР-ни Парламентини башчысы Татьяна Егорованы эм депутатланы атларындан журналистлени спикерни орунбасары Мурат Карданов алгъышлагъанды. Ол залда олтургъанланы асламын таныгъанын, кёпле бла ушакъла бардыргъанын белгилегенди.

- Мен жашаууму   спорт  бла байламлы этгенме.  Биринчи жетишимлеримден башлап бюгюннге дери да сизни бла шуёхлукъ жюрютеме. Журналистлени ишлерини хайырындан спортчуланы хорламларыны, рекордларыны юслеринден  дуния башында битеу халкъ да биледи. Ушакъларыбызны кезиуюнде уа сиз ишигизни сюйгенигизни, хар сёзюгюз ючюн жууаплылыкъны сезгенигизни ангылагъанма,-дегенди ол.
Мурат Карданов журналистиканы айнытыугъа къыйын салгъанланы уллу къауумуна  КъМР-ни Парламентини Сыйлы грамотасын эмда спикерни Ыразылыгъын бергенди. Парламентни Башчысыны Ыразылыгъы бла саугъаланнганланы арасында

«Заманны» редакторлары Трамланы Зухура бла Кульчаланы Зульфия да бардыла. 

Асламлы информация органланы келечилерин битеу министерствола да саугъалагъандыла.  Алай бла «Заманны»  редактору Байсыланы Марзият, газетни корректорлары Бийчеккуланы Жаннет бла Геляланы Валентина, газетни басмагъа чыгъарыугъа жууаплы редактор Кучукланы Сафият КъМР-ни Культура министерствосуну Сыйлы грамотасына тийишли болгъандыла. 

Газетни редактору Улбашланы Муратны КъМР-ни Экономиканы айнытыу министерствосу Сыйлы грамота бла белгилегенди. 

ВГТРК телеканал аманлыкъчыланы къолларындан жоюлгъан журналист Геккиланы Казбек атлы конкурс бардырады жыл сайын. Быйыл анда хорлагъанланы арасында Трамланы Зухура да барды. Ол кюн Зухура дагъыда КъМР-ни Жарыкъландырыу эм илму министерствосуну, РФ-ни Журналистлерини союзуну Сыйлы грамоталары бла белгиленнгенди.   

КъМР-ни туризм жаны бла онгларын халкъгъа баям этиуге, бу сфераны айнытыугъа къошумчулугъу ючюн «Заманны» редактору Таппасханланы Аминат Курортла эм туризм министерствону Сыйлы грамотасына тийишли болгъанды. 

Право низамлыкъны эм законлукъну жалчытыуда жетишимле болдургъан журналистлени уллу къаууму КъМР-де МВД-ны Сыйлы грамотасы бла саугъаланнгандыла. Аланы арасында «Заманны» редактору Тикаланы Фатима да барды. 

«Заманны» корреспонденти Алтууланы Аминат КъМР-ни Жаш тёлюню ишлери жаны бла министерствосуну Сыйлы грамотасы бла белгиленнгенди. 

Газетни корреспонденти Курданланы Сулейманнга эл мюлкде болгъан жетишимлени ачыкълауда къыйыны ючюн КъМР-ни Эл мюлк министерствосуну Сыйлы грамотасы берилгенди. 
КъМР-ни Жамауат палатасы да къатышханды алгъышлаулагъа  - Кульчаланы Зульфиягъа Сыйлы грамота  берилгенди.    

Журналистлеге концерт да къуралгъанды. Музыкалы театрны солистлери Габуланы Зухура бла Азамат Евазов эмда КъМР-ни сыйлы артисти Тимур Гуазов  жыр саугъала этгендиле.