Сатыу-алыуда жалгъан затла болмазча

Тышындан чеклениуле салыннганына да къарамай, бюгюнлюкде бизни республикада розница сатыу-алыу бёлюмню айный баргъаны шарт кёрюнеди: тюкенле ишленедиле ырысхы-техника онгла игиленедиле дегендиле КъМР-ни Промышленность, энергетика эм сатыу-алыу министерствосунда.

Былтырны эсеплери да аман тюйюл эдиле. Ал тергеулеге кёре, 2023 жылда 292,3 миллиард сом багъасы сатыу-алыу этилгенди. Тенглешдирип айтханда, ол буруннгу жылдан онеки процентге кёпдю. Бюгюнлюкде Къабарты-Малкъарда жети рынок эмда 36 ярмарка ишлейдиле, кёп къалмай тогъуз жюз сатыу-алыу объект барды. Дагъыда эл мюлк бла кюрешгенлеге 517 жер бёлюннгенди. 

Рыноклада да болум игиди: жангы тюкенле ачыладыла, аш-азыкъ эмда промышленность товарланы башха-башха жерледе сатарча этиледи, къоркъуусузлукъ да бийик даражада сакъланады.

Аш-азыкъны халкъгъа бек керекли тюрлюлерини багъаларыны ёсюулерин  тыйыу жаны бла ишчи къауум къуралгъанды. Анга Промышленность, энергетика эм сатыу-алыу, Экономиканы айнытыу министерстволаны, Парламентни, КъМР-де УФАС-ны, Жамауат палатаны, Налог службаны эмда прокуратураны, статистика органны эмда талай башха ведомствону келечилери киргендиле.

Бу къауум аллай багъалагъа ыйыкъ сайын эс бургъанлай турады. Дагъыда товарладан къытлыкъ болмазына къайгъырады. Бюгюнлюкде ол жаны бла жарсыу жокъду, халкъны излемлери толусунлай жалчытылынадыла. Алай дагъыда, бир тюрлю чурум чыкъмазча, аш-азыкъ продукция эмда башха тюрлю товарла эркин жетер ючюн, аланы жарашдырыу бла кюрешген предприятияла эм сатыу-алыу организацияла бир-бирлерин ангылап ишлерлерине министерство эс бургъанлай турады. Бек алгъа изленнген ашарыкъладан къытлыкъ боллукъду деген къоркъуу чыкъса, аны юсюнден Россей Федерацияны Правительствосуна олсагъат билдирилликди.

Министерствода айтханларыча, бизни республикада Промышленность продукцияны законсуз сатыу-алыугъа къажау тургъан комиссия ишлейди, аны контроль-надзор мадарла этерге эркинлиги барды. Озгъан жылда кенгешлеринде социал учреждениялагъа жиберилген продукциягъа энчи эс бурулгъанды. Товарланы къадар тюрлюсюне белги салыу башланнганлы талай заман болады да, комиссия бизни республикада бу иш тап къуралырына къарайды. Аллай белгиле тюклю тонлагъа, аякъ кийимлеге, дарманлагъа, тютюннге, улоу чархлагъа, сютге, гара суулагъа, фотоаппаратлагъа салынадыла.

Саулай айтханда, КъМР-ни Промышленность, энергетика эм сатыу-алыу министерствосу республикада сатыу-алыу бла байламлы бар жумушлагъа сакъды, жалгъан продукциягъа къажау ишлеге да тири къатышады.