Магъаналы сорууланы тинтгендиле

Алгъаракълада Къашхатауда КъМР-ни Жаш тёлюню ишлери жаны бла министерствосуну себеплиги бла жаш тёлю ара ачылгъанды. Ол Черек районну жаш адамланы айныуларына иги амалла къурайды, анда кёп магъаналы жумушла, жыйылыула да бардырыладыла. Бу кюнледе уа анда «ГосСтарт.Диалог» деген проектни чеклеринде жаш адамла районну башчысы Къулбайланы Аланнга соруула бергендиле.

Тюбешиуде кёп магъаналы сорууланы сюзгендиле. Жаш тёлю иш бла байламлы районда къаллай амалла болгъаныны юсюнден соргъанды. Дагъыда ала элледе къалырча къаллай иш ачаргъа боллугъуну юсюнден айтхандыла, аны бла байламлы не амалла къураргъа тийишлисин да белгилегендиле.

Арт жыллада районда не зат тюрленнгенин да билирге излегендиле ала. Алан Борисович жыл сайын районда жаш адамланы айныуларына уллу эс бурулгъанын, мындан ары да анга не жаны да себеплик этип турлукъларын чертгенди. Жаш адамланы патриот сезимлери иги ёсгенин да белгилегенди район тамата.

Тюбешиуге келген школчула районну башчысы болур ючюн не этерге кереклисин да соргъандыла.

- Аллай итиниую болгъан манга ишге келип, къаллай жумушла бла кюрешгениме къараргъа боллукъду. Эм алгъа уа хар биригизге да айтырыгъым, иги окъугъуз, мындан ары барлыкъ вузларыгъызда да жетишимли болугъуз, - дегенди ол.

Андан сора да, адамны туугъан жерине сюймеклигини юсюнден да сёлешгендиле жыйылгъанла. Быллай тюбешиуле терк-терк къурала турлукъларын да белгилегендиле жыйылыугъа къатышханла.