Биринчи штангачы къыз

Элжорукъаланы Олеся спортну сюйген абадан адамланы эслеринде биринчи штангачы къызча къалгъанды. Кеси заманында ол жангыз бизни республикада угъай, битеу Шимал Кавказда да спортну бу тюрлюсюнде уллу жетишимле бла къууандыргъан биринчи тиширыу болгъанды.  Аны тренер ишин энди башлагъан Маккаланы Махти эслегенди, къызны къарыуу, фахмусу болгъанын ангылап, аны юйретип тебирегенди.

Иш кёллю, алгъа барыргъа итиннген Олеся да аны ышаныуун алдатмагъанды - тренери айтханны олсагъатлай тамамларгъа кюрешгенди, салыннган борчланы толтурууда къаты болгъанды. Юч ай жараудан сора, ол Заюковода биринчи эришиуюне – республиканы ауур атлетикадан биринчилигине – къатышханды. Анда окъуна къараучуланы сейирге къалдыргъанды. Жетишимли болгъаны уа анга алгъа барыргъа кюч да, таукеллик да бергенди. Андан сора Олеся республиканы чемпионатына хазырланып тебирегенди. Турнирде къыз да эришириги къараучулагъа сейир эди. Анда, 64 килограмм ауурлукъда, ол эки упражненияда 90 килограммны кётюргенди. Ол алай кёп тюйюл эсе да, штангачы къызгъа уллу спортха жолну ачханды.

Ызы бла атлет кесин Краснодарда уллу турнирде сынагъанды, анда башха тиширыула да бар эдиле. Алгъадагъы кёрюмдюсюне 14 килограммны къошуп, бютюн даражалы эришиулеге къатышыргъа кёлленнгенди. Аны Россейни чемпионатына чакъыргъандыла, ол а Воронеж областьда ётдюрюлгенди. Мында Олесягъа къаршчы къыралны эм сынамлы, кючлю штангачылары, дунияны чемпионкасы,  Европаны чемпионатыны призёру сюелгендиле. Алыкъа айтырча сынам жыймагъан Эльжуркаева (ол жангыз да бир жылны жарау эте эди) тёртюнчю жерге чыкъгъанды, майдал алыргъа азчыкъ къалгъанды.

- Къыралны чемпионаты мени биринчи уллу эришиуюм эди, - дей эди ол кезиуде Олеся. – Сынашыргъа керти да къарыулу спортчула бла тюшгенди, ал кезиуледе бир кесек къоркъгъан окъуна эте эдим. Артда уа ала да бир затдан башлагъан болур эдиле, деген сагъыш келеди. Алай бла жунчугъанымы хорлап, Махти Хасанович да кёл этдирип, эришиуге чыгъама.

Жаш, умутландыргъан спортчу талай даражалы турнирге къатышханды, сора Россейни кезиулю чемпионатында доммакъ майдалны къытханды. Ол, Къабарты-Малкъарда бла Шимал-Кавказ федерал округда тиширыуланы араларында биринчи болуп, ауур атлетикадан спортну устасы деген атны алгъанды.