Культура юй – адамла сюйюп келирча болургъа тийишлиди

Байзуллаланы Джамиля Быллымны Маданият юйюне башчылыкъ этеди.  Ол Быллымда туугъанды, ёсгенди, мектепни да мында алтын майдалгъа тауусханды. Бийик билимни алыргъа Къабарты-Малкъар къырал университетни Химия факультетине киргенди, «химиядан устаз» деген усталыкъны алып чыкъгъанды. Анасыны ызы бла бара, урунуу жолун туугъан элини мектебинде башлагъанды, алай анда кёп ишлемегенди. Элни ол кезиуде башчысы Ёзденланы Масхутну жашы Хасан аны Быллымны Культура юйюню директору болургъа чакъыргъанды.

- Бу ишге турургъа эсимде болмагъан эсе да, угъай а демегенме. Жашырмай айтайым, ал кезиуледе тынч тюйюл эди: бу жер манга жангы эди, анда инсандан къурау жаны бла фахму, къуллугъуна тийишли башха шартла керекдиле, жууаплылыкъ да уллуду. Культура юй – элчиле дайым жыйылгъан мекямды, ол адамла сюйюп келирча, ала мында кёргенлеринден, эшитгенлеринден къууанып, кёллери кётюрюлюп кетерча болургъа тийишлиди, - дейди Джамиля.

Тутхан ишине жууаплы кёзден къарагъан, ариу сёзлю тиширыу коллективи бла терк шуёх болгъанды, элни башха учреждениялары, жамауат организациялары бла байламлыкъла да тохташдыргъанды. Салыннган борчланы толтурургъа битеу керекли хазна болмагъанлыкъгъа, иш а баргъанды: художестволу кружокла ачылгъандыла, концертле берилгендиле, маданият ингирле къуралгъандыла.

Юч жыл мындан алгъа «Культураны бла туризмни айнытыу» деген къырал программаны чегинде элни Маданият юйюне ремонт этилгенди. Ызы бла аны мюлк-техниканы хазнасын игилендириуге ахча бёлюннгенди, жангы котельня ишленнгенди, тёгереги айбатландырылгъанды. Ол а саулай да халны тюрлендиргенди: мекям жылы, нюрлю болгъанды, бардырылгъан мероприятияланы саны кёбейгенди. Аны бла къалмай, автоклуб – тепдирилген кёп функциялы ара, башха айтханда, чархлада маданият юй да берилгенди, аны хайырындан элчилени культура жашауларын бютюн бай этерге онг чыкъгъанды.

Бюгюнлюкде анда «Баллы» тепсеу ансамбль, «Искорки» жырчы къауум, «Теремок» театр къауум, тарыхны сюйгенлени «Моё село – Отчизны уголок» клублары ишлейдиле. Чыгъармачылыкъ бла кюрешгенлени саны 160-ха жетеди, аланы араларында абаданла, жашла, сабийле да бардыла. Ала барысы да маданият ишлеге, район эришиулеге бла фестивальлагъа къатышадыла, жетишимли да боладыла.

Былтыр октябрьде уа Байзуллаланы Джамиля Къабарты-Малкъарны атындан клуб учрежденияланы директорларыны Ставропольда ётдюрюлген ючюнчю битеуроссей съездлерине баргъанды.

- Ол жолоучулукъ зауукълу, магъаналы, хайырлы да болгъанды, - дейди Джамиля. – Мени бла бир акъыллы, ишлерге, сагъыш этерге, ойларгъа, жангы, аны бла бирге уа сейир оноула эте билген адамла бла тюбешгенме, кёп жангы зат кёргенме. Быллай эсепге да келгенме – хар нени да артдагъа къоймай, мычымай тамамлау тюздю. Эм башы – адамлагъа игилик келтирирге, аланы кёллерин кётюрюрге, Ата журтха сюймекликни сингдирирге керекди. Элчиле кеслерин маданият ахшылыкъладан бир жанында къалгъан сунмазча ишлерге тийишлиди. Бюгюнлюкде къырал аны ючюн битеу онгланы къурайды: «Культура», «Пушкинская карта» дегенча миллет проектле толтуруладыла, башха программала жарашдырыладыла. Бизни гитче элибизни чегинде бу борчла тынгылы тамамлансала, ол мени гитче Ата журтуму айныууна салгъан къыйыным боллукъду.

Быллымда эки мингден кёп адам жашайды. Маданият юй мында жамауат жашауну, къошакъ билим бериуню арасы, жамауат бош заманын зауукълу, хайырлы да ётдюрюрча жерди. Анда спорт зал да барды, алада эки секция ишлейди. Чекленнген онглары болгъан адамлагъа таплыкъгъа мадарла этилгендиле.

- Бусагъатдагъы заман башчылыкъ этген инсандан терк эм тюз оноула эте билирин излейди. Бу мени, бу уа башханы ишиди дегенча сагъышла чыкъмайдыла, битеу чыкъгъан жумушланы – мероприятияланы, тюбешиулени, эришиулени къурау, аланы видеогъа алдырыу, элибизни тарыхыны, айтхылыкъ адамларыны юслеринден материалланы жыйыу - тамамлауну къолгъа алама. Битеу бу ишде гитче коллективим билеклик этеди, депутатларыбыз, мектебибиз, Старейшиналаны совети, краеведение музей бла байламлыкъла жюрютебиз. Районну Культура управлениясыны бла администрациясыны, республиканы Культура министерствосуну болушлукъларын дайым сеземе, ала бизде къонакъда терк-терк да боладыла. Маданият юй – ол элни кюзгюсюдю. Культура-инновация майданны кенгертирге, адамларыбызны солууларын, саулукъларын кючлерча болумну игилендирирге сюерик эдим, - дейди ол.

Джамиля Алимовна Культура юйге башчылыкъны он жылдан аслам заманны этеди. Бет жарыкълы ишлегени, республикада маданиятны айнытыугъа салгъан уллу къыйыны ючюн Культура министерствону сыйлы грамотасы, Элбрус районну сыйлы грамотасы, ыразылыкъ къагъытлары бла саугъаланнганды. 1941-1945 жыллада Уллу Ата журт урушну эм анга къатышхан аскерчилени эсде къалдырыугъа этген уллу къошумчулугъу, проектлени бла мероприятияланы бардырыугъа тири къатышханы ючюн «Эсегриу эм махтаулукъ» организацияны толтуруучу дирекциясындан ыразылыкъ къагъытха тийишли болгъанды. Байзуллаланы Джамиля кесин бир башха  ишде сезмейди, замандан артха къалмай, бирде уа андан да алгъа бола, чыгъа тургъан жумушланы не къадар тынгылы тамамларгъа кюрешеди.