Къатындагъына къайгъыра билиу

Бу кюнледе Къабарты-Малкъар  гуманитар-техника колледжде жыйылыу болгъанды.  Ары Нальчикни биринчи номерли школа-интернатындан, кеслери  юйлеринде  окъугъан саулукъларында энчиликлери болгъан  сабийле да  къатышхандыла. Алагъа    жарыкъ  тюбегендиле,  концерт  программа  да  кёргюзтгендиле.

Тюбешиуню  аллында, колледжни  директору Барасби Абазов  бу  жумушну  бек магъаналы  болгъанын  чертгенди. «Саулугъу  иги  болгъан   унутуп  къояды,  тёгерегинде  сакъат  инсанла  да  аслам  жашагъанларын. Алагъа  сёз  нёгер  да  керек  болгъанын, алагъа  эс  бургъаныбыз  аланы  кёллерин  жарытады, аны  да  унутургъа  керек  тюйюлбюз.  Аны  себепли  быллай  жумуш бизни колледжде  бардырылгъанына  бек ыразыма, ала  бла  байламлыкъ  жюрютюрге  да  керекди»,- дегенди  ол.

Концерт программаны «Насып» ансамбльни солисткасы Улбашланы Эльмира  аламат  тепсеуле  бла  ачханды. Ол жумушха колледжге келген  сабийле  да  сюйюп  къошулгъандыла.  Аланы школгъа  жюрюрге  амаллары  жокъ эсе да,  хунерли  болгъанларын а  баям  этгендиле.  Чеченов Элдар, Клименко Елена бла  Николай  тепсеуге уста  болгъанларын  кёргюзтгендиле. Дагъыда сабийлени санында синтезаторда, къобузда да уста  ойнагъанла  болгъандыла. Интернатда  окъугъан  Бабайланы Муслимни уа энчи  белгилерчады.  Жашчыкъ  туугъанлы  бери  эшитмегенликге, назмула  жазады, ёню  ариу  болуп, аланы  да  уста  жырлайды. Концертде  эшитдирген чыгъармасы уа  адамланы жюреклерине  жетген эди. Келген  сабийлеге концерт  программадан  сора  да  тюрлю-тюрлю кёллерин  жарытырча  конкурсла,  викторинала  бардыргъандыла.

Жыйылыуда КъМР-ни Жаш тёлю ишлерини жаны  бла  министерствосуну келечиси Гайыланы Джамиля, жандауурлукъ фондну директору Амина Бадракова да  болгъандыла.

Амина Сафраиловна сакъат  сабийле  бла  эрттеден  ишлегенин айтады. Ала  жарыкъ,  таза  жюрекли  адамла  болгъанлары, дуниягъа  сюймекликлерин  да  чертеди. Ол аны  хар  бирине  да  энчи  эс  бургъанын,  ёз  балаларынча  сюйген  да  энчи  белгилегенди.  Жыйылыугъа  келгенлени  да арабызда   эс  бёлюрча  инсанла  жашагъанларын  унутмазгъа,  алагъа  сакъ болургъа да  чакъыргъанды. 

Ызы бла уа  Гайыланы Джамиля сахнада  кеслерини  усталыкъларын  кёргюзтген  сабийлеге  грамотала бла  спонсорла  хазырлагъан  саугъаланы  бергенди.