Жолла мардалагъа келиширча

КъМР-ни Транспорт эмда жол мюлк министерствосундан билдиргенлерича, «Экинчи Чегем – Булунгу» жолну жангыртыугъа къошакъ халда ахча бёлюнюрюкдю.

РФ-ни  Правительствосуну Председатели  Михаил Мишустин ишчи кенгешде жылны ахырына беш регионнга, ол санда Къабырты-Малкъаргъа  автомобиль инфраструктураланы игилендириуге 570 миллион бёлюнюрюгюн айтханды.  Ол «Экинчи Чегем-Булунгу» трассаны эм кёпюрледен бирин  жангыртыргъа къоратыллыкъды.

Михаил Владимирович, быллай болушлукъ жол  инфраструктураны тынгылы хазырларгъа себеплик этгенден сора да, ол санда узакъ эллеге баргъан  жолланы, туризм бёлюмню эм башха проектлени да айнытыргъа болушуругъун билдиргенди.

Жарыкъ эм къоркъуусуз болурча

Къабарты-Малкъарда жолла къоркъуусуз болурча аслам иш тамамланады. Алай бла къошакъ халда  регионну жол   фондундан бёлюннген ахчагъа онсегиз элде  66 километр чакълы бирде   кече жарытырча мадар этиледи. Бюгюнлюкде ишлени кёбюсю бошалгъандыла. Аны хайыры бла Огъары Басхан, Элбрус, Акъ-Суу, Заюково, Батех элледе эм  Нарткъала шахарда, саулай алып айтханда, 44 километрде жолла жарыгъандыла.  Бусагъатда тийишли ишле Лесгор, Псынабо элледе эм  Терек бла Майский шахарлада да барадыла. Планнга кёре, ишле быйылны ахырына бошалыргъа керекдиле.

Кёпюрле жангыртыладыла, черек жагъала кючленедиле 

Бу кюнледе Май районда Черек сууну  кёпюрюн жангыртып кюрешедиле.  Аны Майский шахаргъа келир ючюн  бир къауум элни жамауаты хайырланады. Ол себепден объект  логистика жаны бла болмагъанча магъаналыды. 

Бусагъатда специалистле суу жагъаланы таламазча темир свайла уруп бошагъандыла эм кёпюрню чыпынларын бетон къуюп,  кючлеп кюрешедиле. Ызы бла  гидроизоляция да этилликди эм башха жумушла толтуруллукъдула.

Жууукъ заманда кёпюрню тозурагъан аберилерин да  алышырыкъдыла, тротуарланы жангыртырыкъдыла,  асфальт жаярыкъдыла эм жорукъну билдирген белгиле, ызла да саллыкъдыла. 

Эсге сала айтсакъ, быйыл миллет проектге кёре, республикада тёрт кёпюрге тынгылы ремонт этилгенди.  Аны чеклеринде «Джантуган» альплагерьге баргъан Шхелди кёпюрге,  Арикде, Бахсанда, Заюковода къаралгъанды. 

Саулай алып айтханда, жангыртылгъан объектлени узунлугъу 320 метрге жууукълашады.